近期港股跌唔落，但反彈上13700水平，又乏力再上，大勢有可能變成上落市，回落幅度會比預期收窄，但調整時間會再拖個多月，另一回合升浪才開始。國企同紅籌股表現強勢，對大市亦帶來支持。
恒指連升4日，已重上10日線（13580）同20日線（13640）之上，現時最關鍵係能否升破13700阻力，若破位而上，則有機會上試50日線（13905），甚至補回1月5日的下跌裂口（13941至13991），上落市幅度會在13000至14000之間，較早前預測恒指會回落到12500，現時看來機會並唔大。
大市反覆期間，可炒股唔炒市，到恒指回落到13000至13200時，才部署選擇性吸納，迎接05年嘅大升浪。筆者屬意吸納嘅首選對象係藍籌C輪，特別係和黃（013）、長實（001）同滙控（005）的C輪可優先留意。
中信21世紀（241）由去年11月中的高位2.925元回落兩個多月，跌到2元水平才喘定，上周五大升，由2.075元急搶上2.60元高收，升幅25.3%，成交亦大增到接近7000萬股，一日之內，收復大半失地，股價亦重上10日、20日同50日3條平均線之上，短期若能守穩在2.50元以上，整固完之後，可衝破上次高位，向3.50元推進。
莊士機構（367）近兩個月走勢形成兩個小圓底，近日股價由低位回升上周五收0.78元，已開始擺脫3條短期平均線，MACD亦出現「雙牛」入貨訊號，圓底頂部係0.83元，若升破，短期上升目標指向1.10元。
1月初之時，莊士曾升過一轉，當時消息係染「濠」，研究在氹仔和葡京賭場一帶發展酒店或住宅項目，家吓「濠」潮略退（並未玩完），但莊士股價仍然好硬淨，主要係佢本身嘅地產業務進入收成期，而資產淨值亦好高，引起市場憧憬。
莊士今年推售西半山明德軒貨尾，新盤則有山頂百祿徑、南區香島道同半山巴丙頓道的豪宅，全部售出，可獲利4至5億元。04年9月底結算，每股資產淨值1.89元，但計入投資物業的增值，相信每股資產淨值調升到2.30元，仍屬保守，以股價仍大幅折讓50%計，以可見1.15元。
郭兆誠