重有一個禮拜，就係農曆年，市場氣氛一片好景，成大班人，忙於買新盤炒樓博升值，錢易賺咗，自然忙於為過節諗節目，好好慶祝得來不易嘅好年頭。
各大商場今年嘅新年布置，已大致上完成，賀年節目亦早已排得密密麻麻。其中比較特別嘅，可以話係新地，佢哋特登請咗隊陝西打擊樂藝術團嚟港，由年初二起，一連十一日，喺十一個商場輪流表演。
呢隊表演團，係內地唯一民辦打擊樂藝術表演團體，喺國內攞過唔少獎，成員大多數係國家一、二級演員，才藝出眾。新正頭去逛商場，聽吓碰碰嘭嘭嘅鑼鼓聲，特別醒神。
另外，信和焦點商場大角嘴奧海城，就會用上二千零五個紅燈籠布置，同時配合「百鳥朝凰、孔雀開屏」主題，加入各類型孔雀裝飾，取其意頭好嘅意思。
內地樓市好景，媲美本港，尤其近年新聞多多嘅廣州，舊年牽起一陣炒風，唔少新盤出現搶貨，個別近市中心新盤，二手市場都有承接，而且轉手都有一定升幅，所以吸引唔少炒家入市。
買家多咗，發展商生意自然多咗，好多公司今年都計劃加薪鼓勵員工。蘭西收到料話，一家喺廣州發展地產多年嘅香港地產商，內地員工全體加薪一成，個別獲晉升嘅優秀員工，更大加三成。國內員工月薪普遍數千，加一兩成都係幾百，錢銀事小，員工士氣事大。
長實趙國雄，近排頻頻出差公幹，睇佢扮鬼扮馬宣傳樓盤機會大減。噚日佢落去東涌映灣園售樓處，視察銷情，都只係借助道具搞吓氣氛，拎住迪士尼賀歲動畫片《超人特工隊》隻超人公仔，借迪士尼出品嘅新戲，去硬銷自己個盤同迪士尼幾咁息息相關。
唔少記者都難忘老趙着晒戲服，化行妝，認真去扮嘢，好希望重溫，老趙一面笑住話：「唔好啦！人哋以為拍戲唔係賣樓！」但又忍唔住話，今大年初三啟市時，打算以一身折子戲服出場應節。
地產代理競爭激烈，每有新盤，現場都會經紀多過買家。以往樓市唔好，僧多粥少，爭客往往演變成衝突。
全新樓盤場面墟冚，會出現咁嘅情況一啲都唔奇，不過，噚日喺小西灣藍灣半島，一個賣咗好幾年嘅貨尾，居然都出現兩班代理，為咗爭客而爭執口角。
樓市活躍，既然咁好精力同行家爭執，不如留番啖氣，跟多個客，介紹吓個盤好過啦。
上個禮拜各大地產代理忙於搞周年晚會，忙住食忙住玩，重要顧住搞宣傳。中記晚會事後焦點，當然落在才藝表演成績之上，當晚四組參賽隊伍中，由九龍區前線員工瞓身演出嘅「金裝功夫」勝出，選用熱門電影《功夫》為題，聽講用咗成個月籌備。
九龍區老頂劉瑛琳，寄語各位手足，做生意時都應該好似表演一樣咁認真盡心。
另外，美記就講新興勢力澳門區晚宴，佢哋半年開咗八間澳門分行，筵開超過十席，而攞最佳營業員嘅員工，入職不過三個月。
電郵地址：
