鄧萃雯近兩個月頻頻推辭無綫工作，搞到班高層好唔滿意，認為雯女因為台慶攞唔到「女主角」獎而同無綫搞對抗，所以班高層就向各大部門頒下「封殺令」，喺短時間內都唔會畀雯女拍劇同做節目，連出吓鏡都唔得。
馮仁昭知道雯女早排擔任特備節目《曼佳美慳電大膽笑》主持嘅時候，《娛樂大搜查》曾經派隊拍攝花絮，但當《大搜查》將花絮播出時，鏡頭淨係影住有份演出嘅安德尊、韓君婷同譚小環，當紅嘅雯女唔單止影都冇，就連名都冇提過，你話係咪事有蹺蹊呢？
而無綫大年初一六叔邵逸夫帶隊同觀眾拜年嘅特備節目，搵咗《金枝慾孽》嘅演員孭飛，喺六叔面前表演，但聽聞名單上只係有陳豪、黎姿、林保怡同佘詩曼，竟然冇雯女同張可頤，究竟係咁啱得咁蹺，抑或另有內情？相信大家應該心中有數！
噚日薛凱琪（Fiona）喺九龍灣為一間飾物店剪綵，獲小朋友親吻。佢話酬勞有成五位數字，覺得好滿意。講講吓Fiona竟然唔覺意爆響口，話唔見咗媽咪喺佢十六歲嗰年送畀佢嘅十字架鑽石鏈，價值四千幾蚊，Fiona話𠵱家都唔敢話畀媽咪知喎！
任賢齊同卓勻噚日喺杭州宣傳電影《韓城攻略》，由於活動由ChristianDior贊助，所以佢哋就着住品牌嘅最新春裝赴會，但係杭州嘅氣溫只係得三度，凍到佢哋騰騰震，卓勻重要着咗件低胸衫，所以貪靚嘅女士永遠最抵得冷嘅！
名模周汶錡最近去峇里拍攝美容中心Bella新一輯廣告，佢着上多款性感服裝拍攝，大騷白滑肌膚。周汶錡透露農曆新年會留港休息，之後就閉關寫第二本書，佢話：「上次婚紗書閉足三個月關，今次我會寫啲有關吃喝玩樂嘅，用我嘅生活方式同感受去寫。」
黃子華噚日同佢隊哈痞樂隊一齊喺將軍澳出席「童心栽花慶新春」活動，現場有一百個小學生一齊種盆栽，子華唱咗四首歌。問子華會唔會喺屋企種花？佢話：「新一年會考慮吓種有機植物，有機有機嘛，好意頭！」點知佢隊友話要小心紅火蟻，子華就話：「其實政府可以滅蟻扶貧，如果政府用錢收蟻，我哋即帶頭捉蟻。」
原本碧咸（DavidBeckham）同隊友施丹（ZinedineZidane）上個星期諗住去倫敦拍有關足球嘅電影《Goal！》，點知最後關頭皇馬領隊盧森保高（WanderleyLuxemburgo）竟然唔畀佢哋去，搞到碧咸相當不滿，𠵱家電影公司會同領隊傾吓，希望佢下個月放人，畀碧咸同其他隊友去拍戲。
