紅火蟻正式殺入特區鬧市，又一次危機即將爆發！另一方面，壽爺訓斥阿董風波，重有續集！國家副主席紅曾訪問南美，繼續就阿董問題發表指引性講話，佢話壽爺在澳門向廢董所講嘅，係要廢董總結經驗！
紅曾每次外訪，都好有肥彭風格，親民開放唔在講，重同特區傳媒好老友，郁吓都同特區傳媒記者圍埋飲茶，並且有度犀利，就係對重大敏感問題毫不迴避，有碗話碗、有碟話碟，講嘢豪放，極度權威！
嗱，今次佢就擒七打八，直擊廢董要害，叫廢董「有則改之，無則加勉」！
紅曾呢句說話，擺明就係針對廢董施政報告內所嚴正指出嘅「官商勾結，利益輸送」問題！因為廢董事後在記者會，公然推翻前言，話特區冇任何官商勾結及利益輸送！究竟有定冇，紅爺費事同佢拗，即是話，官商勾結呢味嘢，有你就要改，若然你敢話冇，咁就要因住嘞！
「有則改之」，即是指數碼港問題，咁「無則加勉」呢？就即是暗射西九龍文娛藝術區！即是話，以前數碼港嗰筆，唔做都做咗嘞，就此算數。不過以後西九龍就唔好翻啅咯喎！
咁煲呔若然想上位，係咪要收齊紅曾所講嘅訓示，西九龍問題要諗吓點樣摺埋呢？唔想摺，咁若然西九龍呢單係阿董本人所拍板，咁呔爺係咪應該要在適當時撇帳洗底，向壽紅兩爺講清楚冤有頭債有主，唔關自己事咁呢？
至於紅曾警告民主派，唔好樣樣「顛覆性」兼「結束一黨專政」，即是話呢一樣就係「和而不同」底線！民主派要放棄公投，取消「結束一黨專政」口號，兼發表聲明：今後香港前途，全部交由壽寶紅三爺（排名不分先後）定奪，兼高呼擁護中國共產黨，咁就會榮獲「溝通」渠道嘞！吓？條件太辣？咁鬼叫你泛民主派贏得二十五席咁少呀？係咁現實嘅嘞！
傳真︰2623-9278
電郵︰