國家副主席出訪南美，香港嘅新聞界都跟到實，不過由於做隨團記者亦所費不菲，所以有啲傳媒都冇可能鋪鋪都去，好似有線咁，今次就冇隨團。
其實曾副主席咁八面玲瓏，又權傾一時，跟佢去出訪一定有收穫，八方聽聞，佢非常好記性，所有跟佢外出嘅記者佢都叫得出名字，當年見到有線之花張寶華，佢竟然笑佢係咪有「小張曼玉」之稱，搞到寶華鬼咁開心。
講開出外跟領導人採訪，原來都有好多古仔。話說舊年香港記者隨胡錦濤主席去南美，喺一次聯合採訪胡主席見華僑時，某個電台記者因為漏報一條消息俾同行──好似就係胡主席話，「邊個分裂祖國，就係歷史罪人」，引起軒然大波，全行都要聲討佢，罰佢不准採訪一次之餘，返到香港重要開大會，結果六大電子傳媒阿頭出晒嚟講數，重有新聞處嘅譚兄。結果係點？咪以後只准攝記入去拍晒，唔准記者入，咁就一定唔會出事，真係斬腳趾避沙蟲。
傳真︰2623-9278
電郵︰