準新娘田蕊妮覺得自從杜汶澤公布結婚的消息後，兩人在感情上跨進了一大步，真正達到兩個人一條心的境界，而她答應下嫁男友，是因為發覺對方真的懂得了甚麼叫做珍惜。
田蕊妮說：「外界可能覺得我同阿澤呢段感情都幾轟烈，因為當年父母唔贊成我哋拍拖，對佢亦唔信任，老實講我哋拍拖咁多年，其實都淡淡地。我哋好多時相處，多數係似朋友多過似情侶，當然都會有情侶式嘅相處，但多數都係好似朋友咁傾偈。直至佢求婚我應承咗之後，大家嘅感情跨越咗好多，可以話唔止一大步。」
田蕊妮表示早知阿澤會將結婚之事公開，她亦同意對方的做法：「佢嗰日喺電台節目公布婚訊，我當時瞓咗，係事後先聽番，我知佢會公開，但唔知佢選擇喺電台講。最開心唔係佢公布婚訊，係求婚嗰一刻。」
以前阿澤多次向田蕊妮求婚，她都沒答應，原因是她覺得男友未定性，田蕊妮說：「我以前覺得重未係去到可以同佢組織家庭嘅階段，覺得佢負唔起責任，亦未係時候可以做爸爸，估唔到佢喺斯里蘭卡返嚟之後個人變咗咁多，起碼佢識得乜嘢叫做珍惜，喺呢一刻我覺得佢係好男人，但係生仔嘅事，我重要觀察佢多兩年。我一定會生仔，但係生仔嘅責任真係好大，唔知係咪風氣問題，我有好多朋友，雖然結咗婚，但都唔生仔，因為有啲人覺得𠵱家我哋生活嘅世界好似地獄，但係經過海嘯件事，我知道我哋每日生存嘅地方，其實係天堂。」
阿澤剛開始和田蕊妮拍拖時，只是亞視一名「二打六」，兩人一起後男方事業如日方中，有說是田蕊妮「腳頭好」，對此田蕊妮說：「我都有啲朋友咁講，但我唔覺得係，只係咁啱啫。」
田蕊妮表示結婚一定要「大搞」，兩人打算在洲際酒店擺喜酒，因為杜汶澤曾在該酒店任職侍應生，她覺得特別有意義，田蕊妮最擔心是朋友眾多而掛萬漏一，伴郎人選已定了陳小春，而伴娘她打算找車婉婉。
撰文：張止寒
攝影：陳志嵐
場地提供：旺角朗豪酒店ThePlace