保利香港（119，前稱新海康）呢勻專攻國內房地產，趁勢熱，有得諗。
上星期所見，由北京北辰（588）帶頭，其他如天安（028）、恒中（246）、華潤置地（1109）、沿海家園（1124）同首創（2868）跟住嚟料。祖國房地產股短打熱潮，似係成形。
保利香港上年底公布出售貨輪，架構進一步清晰，核心業務既涉呢期短打熱潮，炒賣佢資產折讓，亦變得合情合理（連出售貨輪獲利1.3億元計，實際每股資產值2.91元）。再講，保利香港主席乃中信系舵手王軍，副主席賀平（原中央衛生部副部長賀彪兒子）。又上年底內地報章有載，阿媽「北京保利集團」旗下保利房地產，估計04年全年銷售額，有望突破45億元人民幣，阿媽及舵手，份屬猛人猛料級。保利香港兩個禮拜前先正式坐正改名，單睇牌頭，係咪只值區區一個幾毫？
丹楓（271）呢隻北京房地產股，成交有異動，可以走一轉。又講兩點：第一，丹楓往年搞北京房地產，唔係咁順風水，但已經喺03年度（12月止）將最大型項目「丹耀」應佔資產值權益，全數撥備，最新04年中期（6月止），每股資產值重有1.38元，現價勁折讓75%。
第二，丹楓揸住香港紅山半島富豪級住宅項目，應佔樓面17萬平方呎，係咁易叫價1萬蚊1平方呎，都值17億，香港地區資產重秤，可以墊底。丹楓個名詩情畫意，兼係靜態Feel，交投亦一如其名，年來淡靜，所以，仍然一句，有異動，上落車都要：「快！」
錢雋