科幻電影相信大家都睇唔少，《星球大戰》、《2001：太空漫遊》好多人都將之奉為經典，撇除故事性一般電影元素，他們的成功，可以歸結一句「前無古人」，而因他們的出現，變成「後有來者」；今個星期碟場新返《轟天戰士決戰明日世紀》，佢係電影史上首部以「全數碼藍幕特技製作」的電影！平心而論故事內容屬大路，但「影像語言」上，看完Disk2「Making」，包你嚇到目瞪口呆！
記者、攝影：朱崇德
話說《轟天戰士決戰明日世紀》，係大部份科幻迷期待已久的DVD，二個多星期前3區碟首推，好多人搶住買！可惜回到家先知是DD二聲道（$98）；可能發行商聽到了碟迷的熱切要求，所以今個星期再新推dts-ES的珍藏特別版（$120），聲效亦加強至6.1完美靚聲，為咗大家唔好買錯，提醒大家要望清封面頂部，會有一個「COLLECTOR'SEDITION」字樣標記，咁就包冇買錯！
機械帝國襲地球
故事內容，主要講述全球知名科學家忽然集體失蹤，緊接是機械帝國突然從天而降襲擊地球，造成嚴重破壞。記者普蓮（桂莉芙柏德露飾）誓要追尋真相，找來一級飛行員天空隊長阿祖（祖迪羅飾）協助；率領着一班女飛行精英的獨眼隊長費姬（安芝蓮娜祖莉飾）亦主動加入。三人追查期間，遇上龐大機甲部隊和神秘女子（白靈飾）處處阻撓，幾經波折終揭發瘋狂博士度夫企圖毀滅地球的計劃。三人要合力阻止他，趕在「倒數」完結前拯救全世界。
全套戲高潮位，感覺是比較偏於前半部份，例如神秘機械人襲紐約，以及「二戰古德軍戰機」大戰飛翼戰機等，都好能拍出科幻電影迫力；不過尾段玩懸疑及解謎，感覺上橋段過於簡單，欠缺張力，而且畫面亦相對地給前半部份比下去！幸好結局在「意料之外」之餘，亦有說服力，都算唔錯。
3D動畫StoryBoard
《轟》之所以成為荷李活科幻電影話題之作，原因是它全以「全數碼藍幕特技製作」，簡單講是除了演員以外，絕大部份的景物、道具，皆是電腦虛擬世界（超過2,000組特別效果鏡頭）；相對近年大熱的電腦特技電影如《星戰前傳》，雖然都有用「藍幕」拍攝，不過仍會使用真實道具及布景；所以今次《轟》絕對是史無前例之舉！另外，由於演員需要在全「藍幕」下拍攝，這會令演員衍生「缺乏環境」概念的問題；所以導演在開拍之前，先用了簡陋的3D電腦動畫原原本本製作了電影一次，由於有了這個像真度幾近100%的「3D」StoryBoard，所以演員對住藍幕都可以好自然演戲。
必睇Bonus：《轟》之6分鐘前傳
Disc2的74分鐘《轟天幕後解碼》，絕對必睇！裏面記錄了10年前的導演加利高雲，以獨立製片人身份，動用4年時間加簡陋的家庭式器材，拍下一段名為《TheWorldofTomorrow》的6分鐘短片，然後說服荷李活製片人，拍下這齣106分鐘的《轟天戰士決戰明日世紀》！其轉折程度，真係有如當年拍《星戰》的佐治魯卡斯！而且Bonus內重收錄了這套6分鐘「前傳式」短片，絕對值得一睇！
