馬主Ｈ召集十年前嘅同事到鏞記見面食飯，敍舊一番。漫畫家帶來十本八本漫畫，送畀舊同事啲仔女睇。馬主Ｈ一望，乃兒童漫畫也，與漫畫家在報紙上發表嘅政治漫畫唔同，電腦王一睇，就知道係漫畫家冇親筆畫。漫畫家笑住話：「電腦王果然眼光銳利，我只係勾畫大樣，寫故事大綱，塑造外形啫，其他就用助手搞掂。」
做手作仔，永冇發達，手停就會口停（左丁山就係寫稿手作仔，幾勤力都唔會發）。賓架Ｐ講過：「凡係請唔到夥計代勞嘅人，永唔會成為富豪。」漫畫家明白呢個道理，逐漸請夥計代勞，將個人搵食工具變成山寨廠，希望將來再變成企業。
點解要出版兒童漫畫呢？漫畫家說：「兩類人嘅錢最易賺，女人錢與細路錢。我睇見王澤嘅《老夫子》出版三十年，歷久不衰，每一年出世嘅兒童都會睇。到𠵱家重可以一個月銷量有七八十萬銀，出版商高枕無憂。譬如一座大型私人屋邨有五十五座樓，管理公司做維修，一年做五座，由第一座做起，做到第五十五座之後，第一座又到時間維修咯。《老夫子》之出版，正係呢個原理，故此長出長有，我現時猛咁出新書，出夠兒童漫畫五年，就可以將舊作重刊，每五年一個循環，到咗六十歲退休，我學到老夫子一半，都已經下半世無憂無慮，環遊世界。𠵱家畫兒童漫畫，其實係搵緊退休金。」
嘩！漫畫賣得嘅話，真係夠享夠長，恨死隔籬。漫畫家嘅舊上司鳳姐文筆一流，寫過書，銷量一般，不禁有感而發：「唉，當年學寫字做乜吖，學畫畫好過！」左丁山亦有同感，可惜天生冇藝術細胞，自小學開始，左丁山嘅美術勞作功課都係老竇幫忙嘅，到𠵱家一筆都唔識畫，各位家長不妨吸取此教訓。