鄧麗君唔經唔覺死咗快十年，歌迷一直都好懷念佢，噚日係鄧麗君生忌，一班歌迷就喺淺水灣搞咗個「鄧麗君五十二情還在」悼念活動，楊天經、藍奕邦、林子瑄同郭力行都有出席。
楊天經同林子瑄等將寫咗祝福句嘅蓮花放入海裏邊，希望將天災同唔開心嘅嘢全部送走，順便祝福鄧麗君。歌迷話五月八日鄧麗君嘅死忌，會將蓮花送去台灣筠園墓園。林子瑄就話四歲時，曾經喺一個表演度同鄧麗君一齊溜冰，佢話：「我記得佢好友善，不時安慰我演出時唔好咁緊張。我做阿Sam（許冠傑）演唱會嘉賓，阿Sam都要求我哋識唱鄧麗君嘅《月亮代表我的心》。」
此外，台灣鄧麗君文教基金會同台北國賓飯店噚日亦舉辦咗「紀念鄧麗君小姐生日宴會」活動，台灣歌手高慧君同于台煙即席唱咗鄧麗君嘅經典名曲，鄧麗君嘅細佬鄧長禧用國語話：「往後將繼續辦更多這方面的活動，而鄧麗君音樂劇今年也將進軍中國。」
張學友前晚抵達長沙宣傳音樂劇《雪狼湖》，而呢齣音樂劇喺北京演出後，最近惹嚟一場官非。話說《雪》劇為防止有假飛，特別喺飛上面印防偽標記，但一個姓宋嘅男子話呢個做法侵犯咗佢嘅專利權，所以將《雪》劇嘅五個主辦單位告上法庭，索償二十萬人民幣（約十八萬八千多港元）。
馮仁昭前日收到風話郭富城怒炒靚仔舞蹈員，噚日城城經理人小美打電話嚟話：「城城係舞蹈員出身，一向最照顧班舞蹈員，佢當佢哋係戰友咁，點會炒舞蹈員，根本就冇呢件事發生過。城城今日睇到呢個報道好唔開心，所以我要幫佢澄清。」
Beyond前晚喺紅館演出第二場演唱會，朱茵、李逸朗同五月天都有去捧場，樂隊浮世繪做嘉賓，成員劉志遠曾經係Beyond一份子，梁翹柏唱《喜歡你》時竟然話：「呢首歌係家駒寫畀我㗎。」黃家強聽見即刻話：「唔好講到咁曖昧喎。」後來現場播咗一段家駒生前嘅聲帶，然後台上出現一道白煙，螢幕投射家駒個樣，家強話𠵱家重好掛住家駒，搞到啲歌迷眼濕濕。
「功夫千人群雄宴」噚日下午三點開始換飛，排頭位嘅婆婆朝早六點幾已經去到排隊，另外有一個居港日籍家庭中村，亦一家四口排隊換飛。中村太太話自己係周星馳嘅超級影迷，佢睇咗《功夫》四次，現場重有位講唔純正廣東話嘅林先生話睇咗套戲七次，佢話：「我覺得套戲好有救肉（教育）意義。」結果一千張飛喺三十五分鐘內換晒。
蔡依林噚日一身性感打扮喺台灣出席富邦銀行尾禡食飯，佢話最近開始籌備新一張唱片嘅工作，平日只係練車，其餘時間就等過年，佢希望喺新年可以賺一筆新年財。而喺噚日嘅活動上，蔡依林只係唱咗五首歌，就賺咗約五十萬港元，佢話今年新年一定封大利是畀爹哋同媽咪。
