早兩日金像獎嘅人打電話通知我首輪投票到咗最後限期，提醒我盡快遞交投票表格。我立即趕返公司填表，因為我覺得係一件好重要嘅事。作為一個電影工作者，除咗希望觀眾會喜歡你嘅電影，更加希望得到行內專業人士嘅鼓勵與認同。所以每年當我覺得有值得提名嘅電影，我都會想辦法盡我嘅義務去投票。有時真係要想辦法，因為早年做副導演嘅時候，試過有電影公司高層向我暗示要投自己公司嘅戲，咁我都明嘅，但係以我嘅性格就梗係陽奉陰違，另外再填過一張心水之選啦，重使講。大家唔使估嗰個高層係邊個，因為佢已經消失咗。
早年第一輪投票參與嘅人數少確實係容易影響到提名嘅產生。不過近年金像獎籌委會嘅人好努力提醒大家投票，投票人數愈多，影響賽果嘅機會愈細，好感謝佢哋嘅努力。
我信全世界都有以上嘅情況發生，無論係選奧斯卡，選總統，連選班長都會有，所以唔好放棄你嘅權利，原來舉手之勞可以令世界變得公平啲。
今年上映嘅港產片好似少咗，但係有幾部自己好鍾意，有票房好好嘅，有啲就麻麻哋，但係都希望佢哋能夠得到提名。
好多人都問我：「你拍戲想攞獎金定係想攞獎品？」對我嚟講，當部戲公映嘅時候每一個買票入場嘅觀眾就等於投咗你一票。我覺得市場係代表咗一個無限大嘅投票機制，獎金獎品都係市場決定。