杜汶澤和田蕊妮暫定在今年六月大排喜宴，田蕊妮表示要多觀察兩年，才會為阿澤生兒育女。而杜汶澤則口快快表示婚後便開始儲錢，以後出糧全數交給老婆，令田蕊妮大感驚喜。
探訪斯里蘭卡的海嘯災區後，杜汶澤早前公告天下，表示今年會迎娶拍拖五年的女友田蕊妮沖喜，而他將喜訊告知母親大人時，阿媽第一反應是「咁你以後唔好花心啦」。今年三十二歲的杜汶澤，向來給人玩世不恭的印象，他真的玩夠了嗎？
阿澤說：「其實我覺得冇乜好玩，去蒲去飲酒自然係有好多靚女，畀到新鮮感我，見到都會想兜搭吓，但又唔敢帶走嘅，有得睇冇得食就冇意思啦。我覺得狗仔隊對我呢種人真係有阻嚇作用，我真係驚俾人影到我有乜越軌行為㗎，我唔係驚影響我嘅公眾形象喎，我只係驚一個人，就係田蕊妮，我驚佢唔開心，影響我哋嘅感情。冇人會突然變身嘅，去完斯里蘭卡之後，我知道自己曳唔出樣，所以選擇做一個乖仔。有人問我係咪一時衝動走去結婚，咁梗係一時衝動啦，唔通重要再計算幾時先係最合嘅時機，整個長遠嘅計劃寫出嚟咩？到時第二個海嘯又嚟啦。」
這幾年阿澤一帆風順，拍一套戲收九十萬片酬，但從沒有儲蓄的習慣，計劃結婚的同時，他終於決心儲錢。阿澤稱自己沒有管理財政的概念，那即是以後會將財政大權交給老婆田蕊妮？阿澤點點頭說：「都係㗎。」記者追問他以後出了片酬即時「左手交右手」，阿澤再次點點頭，在旁的田蕊妮即興奮地問他：「係咪真㗎？」阿澤向她打了個蠱惑的眼色說：「𠵱家做訪問吖嘛。」
阿澤曾於二十二歲有過一段婚姻，但沒有因此而留下陰影，他仍然相信婚姻制度，認為是給女方的一個承諾、一個肯定、一個稱呼，阿澤說：「有啲人拍拖兩個月就叫對方做老公老婆，但我同田蕊妮拍拖咁多年，從唔會叫對方做老公、老婆，我覺得呢個稱呼一定係要結咗婚先至可以用。」
婚期由老闆林建岳出面請白龍王擇吉日，白龍王指阿澤今年運氣不俗，任何一日辦喜事都可，兩人暫訂六月舉辦喜宴。結婚對於一個男人來說，最重要是有責任感，阿澤作好準備去承擔責任了嗎？他說：「我將結婚公告天下，都係想愈多人知，咁我嘅約束就愈大，其實我冇負責任好多年，所以好享受、亦好期待自己去負責任。」
阿澤除了期待在感情上負責任，亦決定在事業上負責任，他將會擔任導演，開拍一套由陳可辛投資、鄭丹瑞監製的輕鬆鬼片，由鄭中基擔任男主角。阿澤說：「以前我只係做演員，今日拍唔晒咪聽日先拍咯，但係做導演就唔同，拍唔晒就好大鑊。𠵱家套戲重係由鄒凱光負責寫劇本嘅階段，我想集中資源喺製作方面，會加電腦特技，所以希望演員嘅片酬同製作費可以成正比。」
