呢排大家都對老董好唔客氣，白鴿黨前黨魁李柱銘直情喺立法會問阿董，既然認得錯，點解唔係宣布埋「引咎辭職」。
老董台戲冇人睇，個個只係向前看。八方聽聞，由北京中南海到香港維多利亞港，有錢有權嘅人都只係關心一樣嘢，就係邊個可以做第三屆特首，早前八方貼過李國章，太子章夠硬淨，連民主派都要照撼，北大人當然高興，但係李家同英國人千絲萬縷就肯定扣分。
喺現階段，想做特首要過兩關，第一係要夠忠誠，梗係對祖國啦；第二要有管治能力，因為經過老董一役，只係識跳「忠」字舞一定唔夠。
論忠誠，唐唐同振英哥跑贏晒，但係論管治能力，佢兩人都尚待考驗，北京怕唐唐係上海幫第二代，靠父蔭上位，未必係真才實料；梁振英就全冇觀眾緣，就算有能力都冇人聽佢支笛，想俾佢管治。
如果真係要睇管治能力，從未心死嘅商人吳光正同機管局主席馮國經都係首選。
吳光正今次就學精咗，話明陪跑唔好預佢，贏梗就隨時可以出閘；而馮國經就好唔同，仍始終擺出一副「咪搞我」嘅樣子，一啲熟識Victor嘅人話，馮國經博士當然夠晒份量做特區一哥，佢既有成功紀錄，又係一位傑出人士，而且能言善辯，做事投入，絕不怯場，總之擁有所有政治領袖嘅條件，不過，唯一佢要補吓不足嘅，係佢老哥面皮唔夠厚，即係唔受得人批評，呢個係死穴，因為港人最鍾意說三道四，班尊貴議員更如狼似虎，十分難頂。
嗱，煲呔就係呢度攝到個好位，因為佢同由九七年換國旗之日起，已經徹底地由英國轉向新主中國效忠；而管治上算係𠱁得掂香港人，民望最高；最後經過多年訓練，佢塊面皮已經到咗爐火純青嘅境界，時笑時怒。煲呔分分跑贏大熱，又一次光宗耀祖。
傳真︰2623-9278
電郵︰
