荷李活女星莎朗史東（SharonStone）近日去咗瑞士嘅世界經濟論壇，同來自各地嘅政經名人討論世界大事。莎姐前日喺討論非洲貧窮問題嘅會議中，不但自掏腰包捐錢，重協助坦桑尼亞籌到一百萬美金（約七百八十萬港元），認真犀利！
莎姐當日同微軟主席蓋茨、英國財相白高敦同坦桑尼亞總統姆卡帕等巨賈政客，出席討論非洲貧窮問題嘅會議。當日姆卡帕總統喺會上發言，話坦桑尼亞人民飽受瘧疾同登革熱嘅影響，每年有唔少兒童同婦女死於呢兩種病，可惜佢哋國家人民財缺，連蚊帳都負擔唔起。
莎姐聽到呢度突然企起身大叫：「我真係俾姆卡帕總統嘅說話深深感動，如果你唔介意，我想私人捐出一萬美元（約七萬八千港元）幫你哋買蚊帳。坦桑尼亞嘅人民喺垂死邊緣，唔可以唔理，我想知重有邊啲人肯企起身一齊幫助佢哋？」
莎姐此話一出，坐佢隔籬嗰位男士立即捐出約三十七萬港元，其後五分鐘，有大約三十個富商舉手支持，最後籌得約七百八十萬港元。
另外，李察基爾（RichardGere）同安琪蓮娜祖莉（AngelinaJolie）當日亦出席咗另一個討論戰爭問題嘅會議，佢哋一見對方，即上前握手，可謂惺惺相惜。