「田亮」事件，搞到國家跳水隊嘅形象走晒樣、烏雲蓋頂，累到領隊周繼紅同一班金牌選手要「封嘴」面對傳媒㖭。好彩擒日喺九龍公園上演嘅「中國跳水及花樣游泳隊愛心慈善大匯演」，有前財爺梁錦松一早帶埋「跳水皇后」伏明霞同囡囡到場，重勁晒溫馨同親子樂，將陽光帶番畀國家隊，國寶伏明霞即係國寶，寧啥夠份量，嗰種幸福和歡愉，真係羨煞旁人，連啲記者都唔好意思問佢有關「田亮」嘅嘢，以免破壞氣氛。你話健康形象幾咁重要呢！
做咗第二任媽媽嘅伏明霞，雖然發福咗啲，但風采依然，喺大會開始前半個鐘就已經到場，同領隊周繼紅及眾師弟師妹寒暄一輪之後，就同下個月兩歲嘅大女司渝喺池邊玩，唔知係唔係跳水運動基因遺傳關係，阿松寶貝女走上跳水彈板時，毫無懼色，喺前輩面前重「印印腳」，好似想露番一兩手咁款。
伏明霞一講開個女啲嘢就好開心，話司渝好耐冇玩水，今日難得有機會同隊友聚舊，順便帶佢出嚟玩吓，至於會唔會教佢跳水，就遲吓先算，會順其自然喎。
喺旁邊嘅阿松就成日笑到見牙唔見眼，手揸住紙巾，隨時準備替個女抹手，可謂服侍周到，佢嗰種開心嘅神情，同佢臨尾做財爺嗰陣時，可以話係一個天一個地。松哥，祝願你哋一家人喜樂平安，以前嘅衰嘢唔再發生，能夠為香港培養出一位跳水皇后就更加無得彈，將功補過嘛！
傳真︰2623-9278
電郵︰
