西九文藝區發展爭議不絕，但利字當前，已去馬嘅地產商堅持落本催谷，長實同新地合組嘅「活力星」牌面最掂，但兩大財團志在必得，自然唔會放過任何宣傳機會，趁喺科學館嘅展覽於下星期一告一段落，而大會堂展覽又未開始之際，「活力星」就自行喺黃埔新天地時尚坊展出西九模型，稍後更會喺長實同新地其他商場搞展覽。
政府為顯示審批西九過程公開公正，三令五申唔畀地產商喺展覽期間搞小動作，包括禁止搵人造馬填意見卡同送紀念品，不過地產商總有辦法突圍而出拉票，「活力星」呢次喺商場搞西九展覽，免費為參觀市民影相做張以西九模型做背景嘅「活力星西九設計個人肖像年曆」，呢啲紀念品唔可以喺官方場地送，但喺私人商場就唔受限制，咁嘅拉票橋都度得出，地產商果然人才濟濟。
傳真︰2623-9278
電郵︰