一人投訴賀歲片名　影視處即留難
向華強發火揚言撤出香港

中國星賀歲片《喜馬拉亞星》送交影視處審批時慘遇滑鐵盧，由於有一名印度人投訴英文片名有歧視之嫌，影視處決定暫時不簽發上映批文。中國星老闆向華強昨炮轟影視處做法無能幼稚，聲言要將電影基地撤出香港，並呼籲同行齊齊撤走。

中國星賀歲片《喜馬拉亞星》原定於下周二（下月一日）舉行首映禮，正式上映日期則為下周四（三日），但此片近日遭一名印度人致函影視及娛樂事務管理處投訴，指該片英文名《HimalayaSingh》中的Singh字帶有歧視成份，影視處昨日通知中國星老闆兼《喜》片出品人向華強，表示暫時不能發出電影上映的批文。

炮轟
「幾十年從未遇過咁滑稽嘅事」
昨日向華強在其位於尖沙嘴的中國星寫字樓內接受訪問時，透露影視處會在昨晚及今日共放映三場試影，讓一班印度人觀看《喜》片，他說：「要佢哋睇完冇投訴，影視處先發出批文。」
向華強又炮轟影視處的處事方法無能、幼稚，他說：「通常娛樂片交去審批一日就搞掂，我做電影幾十年都從未遇過咁滑稽嘅事，等於以前中國電影局做法，涉及警察題材嘅故事，就去搵班公安睇戲畀意見，香港係一個國際城市，𠵱家咁做真係大倒退，影視處應該有自己嘅準則。」
向華強續說：「《受難曲》夠俾全世界猶太人反對，《華氏911》唔通又要搵布殊畀意見？香港政府咁怕事，將來點拍戲呢？我可以肯定香港電影工業已死。影視處重問我新加坡批咗未，聽到呢句話真係好火滾，我部戲喺內地同馬來西亞都批咗，大馬都有好多印度人住，香港點解要跟新加坡電檢？董政府咁樣，香港電影點生存？」
據知《喜》片投資了三千萬元製作費，另宣傳費亦高達二千萬元，下周二舉行的首映禮的戲票已售罄，連贊助商的贊助及放映戲院等均一早準備妥當，若無法如期舉行首映禮一定損失不菲。

笑話
「印度咁多億人都冇人投訴過」
向華強昨日不滿地說：「影視處叫我延期，政府去到咁無能嘅地步，咁會令我損失，我哋係上市公司，有任何損失一定會追究，中國星喺呢行拍咁多戲，投資咁多錢，養咁多人，但影視處做法咁低智，香港電影冇希望喇！我好心灰意冷，我大聲呼籲大家撤走，去第二度謀生，我要將中國星搬去澳門，澳門咁旺，何厚鏵（澳門特首）咁醒目，澳門實歡迎，你問吓其他人有冇道理先，點解香港會搞到咁嘅地步。」
對於特首董建華早前在施政報告中提及會支持電影及創意工業，向華強力斥對方講一套做一套，他炮轟道：「我盡心盡力去做，得到政府咁嘅待遇，政府班友唔知點做嘢，好谷氣，之前董特首出嚟講支持創意工業，但係政府今次表現令我好沮喪同失望。」
向華強並重申《喜》片在印度拍攝外景兩個月，獲當地政府大力支持，他說：「我哋都係用同一個戲名去印度申請拍戲同審批，印度政府好支持，重大力宣傳，印度咁多億人都冇人投訴過，𠵱家香港有一個印度人投訴就唔批，簡真係天大笑話，就算最後批到都唔會開心。」

聲援
「呼籲政府珍惜電影業成就」
另一方面，一班電影明星昨日紛紛聲援中國星，李連杰昨接受電話訪問時說：「香港最寶貴地方就係有自由，電影業以前咁蓬勃，都係因為夠自由，《喜馬拉亞星》只係一部笑片，睇唔到有乜嘢歧視，我呼籲香港政府珍惜電影業有如此輝煌成就。」導演爾冬陞說：「影視處冇理由唔批，結果重要放喺印度人手上，影視處應該有自己批斷力，咁做令投資者損失好大。」
採訪、攝影：魯萍