特首董建華噚日主持拔萃男書院附屬小學嘅開幕禮，之後同幾個小三學生對話，大講足球、NBA。董伯伯讚班同學仔知好多嘢、好活潑，又讚佢哋讀書讀得好叻，呢班小朋友原來都好識送高帽，其中一個大聲回應話「你統治香港統得好啲」，真係拍爛手掌。
同學仔呢句話可以話係讚董生，如果「心邪」啲嚟睇，令人覺得係暗寸緊董生管得唔掂，唔怪得八方問咗幾位在場人士，都覺得嗰位小學生係叫董生要管好啲香港。
八方喺呢度要補充幾句，當時由於場地所限，本報記者冇得入現場，事後聽到嘅版本都唔同，八方最後都係睇番新聞處放上網經剪輯過嘅片段，若以官方版本，大家應該係互送高帽，小學生都識同老董客氣，真係後生可畏。
另外，賽馬會方樹泉綜合青少年服務中心訪問咗九百六十五位小學生，以佢哋嘅「小眼睛看大社會」，睇吓佢哋對廉潔嘅認識，結果十大廉潔人士之首係藝人劉德華，以華仔嘅正氣形象都算係當之無愧，而我哋成日俾人斥縱容政府「官商勾結」嘅特首，都只係排第八位，連女子組合Twins都高過佢。
不過咁，特首已經係官員之中排名最高，其次最高排名嘅官就係財政司司長唐英年，排第十一，十三位先到曾蔭權。其實，一個政府最重要嘅，除咗係有效率之外，相信都係廉潔，但係喺天真可愛嘅小學生眼中，除咗特首好少少之外，其他重要官員嘅廉潔形象都未夠，希望有關當局唔好睇小呢個調查，因為呢班小學生係我哋未來嘅棟樑。
（圖）老董同一班小學生傾偈，互送高帽。
政府新聞處圖片
傳真︰2623-9278
電郵︰