尖沙嘴街頭巧遇水貨大亨袁仁祥，只見佢腳踏一對時下最流行嘅Visvim波鞋，呢對鞋低調有型，卻出奇地同祥哥一身囂張的裏原裝扮相襯。祥哥着緊對Zucca特別版，唔使一個禮拜，鞋上布滿自己的水貨煙灰，證明祥哥係真正用家。
祥哥仍然沙塵：「哈，呢兩年大大話話我都賣咗過百對Visvim出去喇，主要賣特別版，因為旺角芝加哥有普通版賣，費事搶人生意喇！上個禮拜日本剛剛出咗呢對ZuccaXVisvim特別版，唔使幾日賣晒，咪又靠我哋班行家食晒批貨返嚟香港賣囉，日本Yen價29,800，我哋賣10算，為港紙$2,980，都唔夠賣，重斷埋碼㖭！對鞋唔平㗎，重咁好賣，證明呢對鞋喺香港好掂！聽講Visvim全靠香港本潮流雜誌煲起，加埋SillyThing班藝人成日着住做人肉廣告牌，香港班潮青就齊齊追捧喇！話時話旺角間芝加哥鞋舖又係好嘢，將普通版Visvim跟Yen價七五算賣，如果加埋日本稅同運費，其實香港買Visvim重平過日本，呢啲咪識做生意囉。相反批發日本雜誌嗰幾間大行，竟然敢喺三越同UNY將BathingApe本05目錄炒貴100蚊，唔理公司形象，呢啲咪不智囉！𠵱家我喺香港買日本書，只會幫襯Sogo間旭屋，因為佢哋夠均真，冇趁火打劫！呢啲就好嘢喇！」
主持人：大食Jack
八卦熱報：[email protected]