歌手開演唱會，除咗要喺服飾同舞台度花盡心思之外，重要勁歌熱舞，咁先至夠吸引，而台下嘅歌迷一向都好眼利，佢哋除咗識欣賞自己嘅偶像外，重會「愛屋及烏」，尤其係一啲靚仔靚女嘅舞蹈員，就更加係昅到實一實。
不過，馮仁昭早排聽一位靚仔舞蹈員向朋友訴苦，佢話之前幫郭富城嘅演唱會伴舞，點知佢喺謝幕嘅時候，頻頻俾台下嘅妹妹仔fans讚佢靚仔同跳舞好叻，而有咁啱得咁蹺又俾城城聽到，之後呢個靚仔舞蹈員就俾人炒咗，冇得撈嘞。
馮仁昭覺得如果自己都係做伴舞起家嘅城城真係怕俾人搶風頭，就有啲唔夠大方囉。其實做人係唔應該忌才，樣樣嘢都驚人爬過頭，咁怕競爭，又點會有進步呢？
謝霆鋒前日接受商台訪問時狂踩自己公司八個歌手合唱嘅賀年歌，重形容連佢養嘅龜聽咗都會病咁話。霆鋒噚日就專誠去商台開咪道歉，佢解釋話：「我個比喻可能真係誇張咗，若然令到大家唔開心，真係對唔住。公司上下嘅兄弟為咗隻歌都盡咗一分力，可以講係我自己嘅未成熟囉。」
許愿早排接受訪問，聽玄學家李丞責師傅指點。講到許愿經歷過婚姻失敗、親友逝世同財政問題嘅多重打擊，原來佢喺幾年前有過自殺念頭，佢話：「我有情緒病時諗過自殺，經過醫生嘅治療，最終都可以戰勝病魔。」而李師傅重講許愿嘅真婚姻會喺四十二歲出現，而對方會係同佢年齡相差好遠嘅「少妻」。
林峯早排喺新加坡拍攝劇集《YummyYummy》嘅時候，俾周刊影到佢攬住條女，前晚佢由新加坡返港時解釋話：「個女仔係當地演員嘅朋友，我哋成班朋友一齊玩，正常交朋友啫，我唔係晚晚去蒲，只係放工去relax吓，唔通去coffeeshop咩！」
蕭薔噚日喺台灣出席宣傳活動，早前有人預測佢今年有機會發生異地情，其實蕭薔今年已經三十六歲，係適婚嘅年齡，蕭薔話：「真的沒有想過要幾多歲結婚，其實十六歲時，我就想結婚，姻緣事要問老天吧，每個人都在演上帝給他的劇本，何況現在的離婚率這麼高。」
