雞年防詐 - 左丁山

雞年防詐 - 左丁山

今年係甲申猴年,立春之日係癸水日,隻猴子定性係水猴,滑溜溜,周身濕,性好跳上跳落,彈吓彈吓,唔怪得股市波幅甚大。明年係乙酉雞年,隻雞會係乜嘢款呢?
八卦邱話立春之日係二月四日早上一時後,農曆就係十二月二十六,按節氣計算,過咗二月四日早上二時左右,就已經係乙酉年。立春嘅八字係乙酉年戊寅月己未日乙丑時,共四土三木一金,欠水缺火,無火生土,生氣不足。立春日屬己土,故此雞年隻雞係土雞,雞本身已經飛唔起,彈跳力不強,更屬土,睇嚟雞年股市頂多平穩發展,波幅冇猴年咁大,股民搵到八至十個巴仙嘅話,應該滿足。

春天己土,據命書話:「因臘月未除,餘寒未退,故丙為尊,得丙照暖,萬物自生。」睇番立春八字,欠丙火,幸好寅月內藏丙火,己土不致太凍,可惜八字內有乙無甲,乙乃柔木,不能疏土,雖多無益,且乙多者,主奸詐。咦,咁講法,隻雞可能係奸雞噃,大家小心乙酉年之內,奸詐欺騙之事迭出,師奶慎防祈福黨橫行無忌,股民慎防大鱷整蠱做怪,啲虛無概念股不宜沾手,做生意要講清楚合約,口講無憑也。
純睇八字,甲申年立春癸丑日嘅八字幾好,隻猴子身強體壯,相形之下,乙酉年隻雞土頭土腦,恐怕有啲奸性。如此看來,○五年實質上唔會好得過○四年噃。
上面講乙多者,主奸詐,需要解釋,免生誤會。春天己土,需要丙火(太陽之火)照暖,亦要陽木(甲木)疏之(沿用玉不琢,不成器之理)。乙乃陰柔之木(花草之類,非大樹之木),生於土上,其實不能疏土,但表面上就似係,容易呃倒人。八字嘅解釋,極多變化,個個case唔同,千祈唔好以偏概全。