恒指反覆拉鋸，熱門藍籌變化輕微，恒指成份股中升幅或跌幅超過1.5%嘅，只得3件。佢哋係招商局（144）升3.8%，德昌（179）升2.1%及華創（291）跌1.8%。
招商局C輪4627：招商局收15.20元，升0.55元，所有招商局C輪都升，標準輪4627最勁，收44仙，升幅11%。4627喺8月初到期，平水，槓桿率3.5倍（有效3.3倍），引伸波幅27.2%，成交好奀，得48萬份。招商局創出新高，PE20倍過外，恐怕上便水位有限，4627雖然勝在平水，但爆炸力有限，買賣又難，搞唔過。
德昌C輪2225：德昌收7.40元，升0.15元。德昌1年前高位10.85元，因為業績麻麻，過去幾個月已失去昔日光采，𠵱家個價得番以往高價7成以下，耐唔中彈幾個位上去唔奇，但要有大作為，並唔容易。
德昌C輪有3件，2225叫做最多人買賣，但成交金額都只係夠買1架日本車，正股上升，拉動隻輪彈升23.6%做咗是日輪王阿4。隻輪下月28日到期，下月22日最後買賣，即係剩番13.5日買賣，溢價7%，槓桿率33.6倍（有效13.1倍），引伸波幅39.7%，時日無多，跟唔過。其他德昌C輪，亦冇隻睇得上眼。
想造淡嗰邊搵銀，又唔得，因為德昌冇P輪。
華創C輪3816：華創收11.20元，唔見0.20元。4隻C輪，1隻冇成交，3隻下跌。博正股反彈，3816最啱，夠晒長命，明年12月到期（唔明點解發行商要發咁長命嘅窩輪），溢價9.1%，槓桿率5倍（有效3.4倍），引伸波幅30%，弊在交投靜得交關。
章盛