新世界主席鄭裕彤噚日親自主持萬邦投資股東大會，會後俾記者問佢會唔會幫吓老友羅兆輝，事關神童輝最近喺澳門因涉嫌販毒被捕，彤叔就話，個個都係老友，但佢同羅兆輝已經幾年冇見面，之前都叫佢唔好食（毒品），希望佢快啲戒甩。
對於近期有立法會議員猛嗌官商勾結，彤叔就話，邊有官商勾結，「香港有廉政公署㗎嘛！」佢重同大家拜早年，希望今年冇人失業，個個搵到錢。佢話新世界嘅員工都有人工加，加幾多佢就唔多理，但佢自己就冇人工，係白做，可以話對得住啲股東。
不過，噚日啲股東對於大會後嘅食品，就好有意見，事關萬邦投資出名對股東好，以前曾經請食龍蝦、鮑魚；不過噚日就縮皮好多，只係安排咗個下午茶中式點心，食普通嘅蝦餃燒賣啫。
傳真︰2623-9278
電郵︰