由迪士尼同彼思動畫公司聯手製作嘅《超人特工隊》下星期四正式喺本地上映，呢套卡通已經獲得本屆奧斯卡「最佳動畫片」提名。套片除咗搞笑之外，場面亦非常壯觀，當中嘅超人家族個個身懷絕技，十分生鬼，而超能太太比主角超能先生柏波更加醒目。
《超人特工隊》雖然以力大無窮嘅超能先生柏波做主角，但佢都唔算係最醒目嗰個，本來被迫收山嘅佢因為技癢難當，偷偷背住老婆再做超人，點知被壞蛋呃咗都唔知，要勞煩老婆深入虎穴救番佢。
超能太太途中亦要照顧埋囡囡柏小麗同囝囝柏小衝，佢喺危急情況下運用身體嘅彈弓絕技，喺空中變成降落傘，又喺海上變成橡皮艇載仔女到森林救老公，真係一個超能好媽媽。
父母咁犀利，幾個細路當然有番咁上下功夫啦，佢哋發揮出超能身手，平日鬼咁百厭嘅柏小衝擁有一對飛毛腿，跑得快到好似神行太保咁，就算壞人坐飛碟追佢都冇有怕。
而本來好怕醜、平日個樣成個《午夜凶鈴》貞子咁嘅柏小麗，亦發揮佢嘅隱形術同保護罩嚟對抗壞人同巨型機械獸，非常型女。至於BB柏積亦都非常厲害，佢喺片尾會帶畀觀眾好大驚喜！