呢幾日小初發現一個現象，就係有啲股票批完股不但唔跌，反而倒升。好似太平洋航運（2343）日前遭主要股東減持，數量有成廿幾個巴仙已發行股本咁多，但股價一樣企得好硬淨，噚日升0.75％，收3.35元，高過配股價3.125元。
照計主要股東套現屬利淡消息，加上配股數量咁大，點解隻股會紋風不動呢？經紀黃話，皆因芬佬睇好航運股前景，東方海外（316）和中遠太平洋（1199）都一直有芬佬追捧。
至於太平洋航運，睇盤路可見配售代理頂得好勁，幾乎所有沽盤都接晒，因此隻股可以咁硬淨。
另一隻配完股而股價上升的股票係首創置業（2868），剛剛以每股2.16元，配售1.13億股。據聞認購一陣間就滿額。
由於新股未出籠，加上噚日有大行出報告推介首創，話股價較資產淨值有大折讓，所以股價走勢甚靚，升6.32％，收2.525元。
慕容小初