彼思動畫一出，真係好難唔賣個滿堂紅，2月3日上畫嘅《超人特工隊》當然亦唔例外，好多人睇過之前嘅預告片後笑到肚痛，預計上畫後乘住農曆年會有驚人票房。為進一步催谷呢股熱潮，電影公司更一口氣推出6大平台嘅遊戲版本，務求打機嘅人都會玩到。香港方面重搞咗一大堆宣傳布景同活動，總之要你出親街都見到《超人特工隊》一家四口為止！
記者：許福合
其實上年11月，《超人特工隊》（TheIncredible）已經喺美國上畫，呢6大遊戲版本亦陸續推出，除GBA版改以2D玩法外，其餘5個版本可算一模一樣，若想畫面靚就玩電腦或XBOX版。可能有部份港人之前已玩過某個版本，不過屬於美版水貨嘢，始終唔係太多人留意。代理就啱啱引入香港行貨，大家毋須改機之餘，賣價亦相當之抵玩，睇完戲之後意猶未盡，大可買番隻Game回味一下。
一家人各有本領
無論電影或遊戲，《超人特工隊》故事背景其實差不多，都係源自電影編劇BradBird嘅大腦，所以玩遊戲同親身去睇電影可以話分別不大，最啱戲迷預先作個「Preview」！從主角Mr.Incredible名字，就可知道故事會有不何思義嘅事發生，事關原來主角一家四口都並非常人，自各擁有唔同嘅超能力，主角Mr.Incredible具備異常強大破壞力，一拳就可將敵人打出街，其妻子Helen更有個彈弓女俠綽號，雙手可伸縮自如作出攻擊，女兒Violet可以隱形，兒子Dash跑速驚人，全家人合力再加上朋友幫助，就要去對付敵人Syndrome，不過主力仍以父母為主，當中又以Helen具備伸縮能力較為好玩，既可用來對付敵人，又可用來高來高去，比Mr.Incredible一味狂打還要好玩。
勇闖18個版圖
基本上依據電影劇情，分為18個版圖，初期會以美國摩天大廈天台為背景。畫面設計同電影一樣美式動畫風格，難度唔算太高，去到特定位置，就會出現提示，教你如何通過，而每個版圖都會使用不同角色，玩家要充份利用角色特殊能力，才可以通過。每一個版圖雖然唔算大，基本上只有一條路前進，應不會迷路，最啱喜歡爽快要一直打餐飽嘅玩家。操控性係此遊戲略為不足嘅地方，視點轉換比較慢，經常有揮空拳打唔中嘅情況，尤其主角Mr.Incredible動作慢，出咗就收唔番，揮空好易被圍，玩時要特別留意。
GBA版橫向動作
《超人特工隊》嘅GBA版遊戲就較為特別，會變成2D顯示嘅橫向動作遊戲。論畫面，當然不及家用機或電腦版漂亮，不過並無破壞遊戲可玩性，玩法有啲似《FinalFight》，例如邊行邊清除嘍囉過關、又或使出連續技、最後決戰Boss等。主角一家四口仍會出動，各自使用唔同技能對付敵人。筆者就覺得GBA版本最值得一提，係必定要開聲來玩，音樂好有以前超人片味道，配合畫面，「娘」得嚟又好鬼過癮喎。
鋪天蓋地宣傳攻勢
《超人特工隊》係迪士尼與彼思合作嘅第6部3D動畫，之前《反斗奇兵1&2》、《蟲蟲特攻隊》、《怪獸公司》、《海底奇兵》等均極受歡迎，所以今度特別受各方期待。電影已定於2月3日在香港上畫，除咗搵來一班明星替劇中主角配音外，宣傳攻勢亦陸續有來；由大廈海報、交通工具廣告都已經出現於大小角落，氣勢強勁！另外，Bossini亦與柯達合作，只要於Bossini購物，即可免費拍下數碼影像，再製成《超人特工隊》4R靚相，過程只需15秒，Fans要留意！
對應機種：XBOX、PS2、GC、GBA、Windows、MacOS
遊戲類型：動作
遊玩人數：1人
製造商：THQ
行貨售價：$299（Xbox/GBA）、$188（PC/Mac）
(C)Disney/Pixar.(C)2004THQInc.
