今年一月二十八日，係農曆甲申年十二月十九日，就快過新年。最近有老友問：「你以前有寫過幾時團年最好，今年又點呀？」其實左丁山邊度識得咁多吖，只不過易學會傅會長指導啫。今年傅會長嘅好友梁玳寧已經將傅會長之言在專欄寫晒出嚟，無謂執口水尾啦，不過玳寧乃是大好人，佢吩咐左丁山最緊要將啲訊息傳開去，等多啲人知，佢唔會告左丁山做文抄公喎。既然如此，不妨轉述一次。
據傅會長指示，下列日子要注意：
（一）團年日最好係年廿四，即二月二日星期三，此日晚上由五時至九時都係吉時（傅會長話香港與標準時間相差二十四分鐘，揀時辰延遲半小時更保險，即係由五時半至九時半）。團年日次選係年廿八（二月六日）。
（二）開年時間：年初一晚上九時三十分後，提早吃開年飯，年初二不宜。
（三）乙酉年開工日：年初四（二月十二日星期六）係歲破日，不宜開工，最好係拖到年初七（二月十五日），是日從上午九時三十分到下午三時，都係開工好時間。如果年初四一定要返工又如何呢？冇計啦，工就照返，留番年初七就做一啲開工動作，如抹枱呀、抹椅呀等等。既然如此，左丁山就會放假到年初七。
（四）年初一出門：年三十晚上十一時後已是年初一，子時、丑時與寅時都宜出外（即十一時後至早上五時）迎財氣、喜氣，朝東北方向步行十至二十分鐘；留在家中，朝東北方向上香拜神或大動作的鞠躬。
肖雞、肖兔、肖鼠、肖馬之人犯太歲，最好佩戴銀製太歲牌（有龍像為宜）。以上各點，信不信由得你，各自思量可也。