香港報業評議會日前選出新一屆領導，嶺南大學校長陳坤耀又獲連任做主席，朱立同黃錦燊做副主席。
陳主席成日都想爭取好似消委會目前擁有嘅「有限度豁免被起訴權」嚟監察業界，包括點名批評不受誹謗法起訴，呢樣訴求，其實好啱，吓吓都畀人告，叫主席點做嘢？咁就唔使跟法改會建議，搞個「自律委員會」，處理業界侵犯私隱嘅問題。不過，政府就好似重未有定案，有人笑話，如果老董快啲拍板，佢位特首辦主任林煥光可能唔會被人拍到同密友去日本嘅照片，當然林生係公眾人物或者不受保護。
至於舊年老廉搜查七間報社，報評會就認為老廉做法過敏。報評會舊年全年收到十九宗投訴，一半涉及侵犯私隱，三成幾涉及失實。
講開新聞自由，政府最近就西九成日寫啲鴻文畀報紙登，話明唔好刪改，某英文報認為此舉等於叫新聞界做政府喉舌，竟然拒絕刊登，重叫政府不如畀錢登廣告，唔知報評會受唔受理呢類投訴。
（圖）陳坤耀做咗報評會主席四年半，都冇人同佢爭。
傳真︰2623-9278
電郵︰