恒指最高曾升126點，埋單幾乎打回原形，只有5點進帳。由本周一最低13320起計，至昨日升至最高時，恒指升430點，高位有回吐好正常。吼低位買嘢，高位則套利，短炒搵銀之道。
長實C輪3560：長實（001）平開71.25元，最高72.25元，最低71元，埋單價71.50元。長實C輪多數冇乜表現，最叻嗰隻3692，都只係有3%升幅。每逢月底，啲輪壽命心理上又短1個月，溢價通常都收窄。太短期嘅輪，要避開吓。
長實因太子鉅增持，周二殺上71.75元，稍作整固，有機會再高幾蚊，買啲遠期嘅C輪搵銀勝算高。3560昨收29.5仙，跌5%，最諗得過。隻輪6月中到期，溢價4.8%，槓桿率24.2倍（有效11.3倍），引伸波幅20.8%。隻輪掛牌兩個月，月初最高83仙，𠵱家個價喺谷底，過去兩周交投大增，逐漸成為最熱門長實C輪之一。
太AC輪3528：太A（019）喺61元上下浮沉，收60.75元，唔見1格。太A係夠晒實力股份，個市好番，唔會冇佢份，近期新高價65元，過一排有機會重見。太AC輪有12件，交投好少。其中4596明年1月夠鐘，壽命夠晒長，按盤價（即係冇成交咁解）85仙，溢價4.5%，槓桿率7.1倍（有效5.0倍），引伸波幅25.1%，數據唔錯，弊在冇成交。不妨諗下3528，輪價36仙，溢價9.4%，槓桿率16.9倍（有效7.6倍），引伸波幅22.1%。溢價係高啲，不過11月至夠鐘，而槓桿率又夠大，冇問題。隻輪昨日有15球成交，交投唔算太靜，買賣唔太困難。
章盛