平霸手機趕過年兩大新機唔使$900

𠵱家買手機，個個都話要幾多萬色靚芒，又要百萬像素鏡頭，最好就有埋藍芽紅外線功能一大堆。之不過，但求可以打出打入嘅依然大有人在，而沉寂一輪嘅平價入門機市場，近日由Motorola嘅C157及ALCATELOT355再次點起火頭，唔使夠勁只求夠平，兩部新機以不足$900價位登場，齊齊做新一代平霸！

記者、攝影：劉耀祥
ImageGirl：小慧

話就話手機功能要愈勁愈好，不過對於學生哥、老人家，甚至想買部手機畀屋企外籍工人嘅僱主，價錢先係MainPoint，只要做到手機基本嘅通話功能就已經心滿意足，所以平價入門級就絕對係一盤大生意！之但係近年內地手機橫掃本地手機市場，尤其平價機市場差唔多成為內地手機嘅天下。不過Motorola及Alcatel日前就齊齊再闖入平價機門檻，前者以$880開賣，後者更犀利，$780已經有交易，真係買多部做「門口機」都抵！

OT355換「平」衫

講到明係平價入門機，對於手機功能，基本上已經近乎「無欲無求」嘅境地，反而外形更會加多兩錢肉緊睇真啲。而嚟自法國嘅ALCATEL，新機OT355就一貫直身機風格，白色機身相當iPodFeel，再加上「泡泡」造型嘅按鈕，造型非常可愛。而機身兩側亦設有防滑膠邊，拎上手感覺唔錯。不過OT355唔淨止係獨沽一味得可愛，更具有換殼功能，而且換殼方式亦好特別，唔係求求其其面殼加底殼就算，而係上下兩個「U」形殼，都算幾有新意！

■「泡泡」造型嘅按鈕，外形非常可愛。

■換殼方式好特別，兩個「U」形位扣上機身。

■機頂手繩位亦十分得意，不過較為容易整污糟。

■機側有防滑膠邊，增加安全感。

功能做足本份

除外形討好之外，OT355以平價入門機而論，亦都做足本份，內置6萬5色彩芒，解像度達128×128像素，而且Size夠大，睇落都幾舒服。功能選單用上傳統九宮格介面，對於一般用家，都相當易上手。雖然OT355並冇內置影相鏡頭，不過亦支援MMS功能，朋友Send相嚟都唔怕睇唔到。當然，支援得MMS，亦唔少得GPRS及WAP等功能，而OT355更支援JAVA功能，內置有3個遊戲，唔夠玩更可以隨時Download，學生哥就最開心。以$880機價而論，OT355可算係抵玩之選！

■功能選單以九宮格顯示，方便易明。

■機內有3個遊戲，包括經典遊戲《貪食蛇》。

ALCATEL OT355

制式：GSM900/1800雙頻
屏幕：6萬5色（128×128像素）
功能：MMS、GPRS、WAP、16和弦
備用時間：320小時
通話時間：6小時40分鐘
體積：98×45×20mm
重量：85g
ALCATEL查詢：31802777

■$880

拍電盈推黃頁卡

另一部係Motorola嘅C157，唔單止照顧到入門用家嘅通訊需要，更照顧埋一般衣食住行，因為摩記推出C157時，更夥拍電訊盈科推出「黃頁卡」。隨C157會附送一張「黃頁卡」，體積同一般記憶卡差唔多，卡上附有條碼，最特別係設計成手機繩外形，唔使袋多張卡之餘，幾時想用都用得到！用家只要去到指定商戶消費，Show吓張卡就會有特別優惠，指定商戶遍布各行各業，唔單止係Shopping、睇戲定去食飯，甚至乎美容亦都包括在內，的確夠晒細心！

■隨機會送手繩形「黃頁卡」，扣落機度就用得。

■機背設有獨立喇叭，聲量十分充足。

■機底充電位設有狀態顯示燈提醒用家。

獨立喇叭播鈴聲

MotorolaC157唔係淨識用「黃頁卡」大搞噱頭，因為C157本身亦都相當出色。雖然與ALCATELOT355一樣主打平價市場，不過外形就截然不同，硬朗線條及銀灰色機身，似乎較適合男性用家。除具備一般手機之WAP及GPRS功能之外，亦都支援16和弦，雖然唔算係頂級靚聲，不過Motorola好有心思於機後再加上一個喇叭，唔係用聽筒位做埋喇叭，令聲量都夠大聲，尤其啱晒老人家！之但係顯示器就略為細小，顯示文字及數字都較細粒，好彩都夠光及清晰，都算係拉番少少分！

■並唔係五方向掣，中間按鈕只係開啟功能選單。

■畫面較細，選單要逐個逐個轉出嚟。

■雖然畫面細，不過內置遊戲亦都幾有玩味。