張學友早前喺北京演出舞台劇《雪狼湖》國語版，製作公司已經落實四月十五日至二十日喺紅館演出六場，馮仁昭收到料，學友呢次喺香港演出，女主角將會換咗林憶蓮同台灣女歌手許慧欣，其餘嘅基本班底不變。
學友喺九七年做《雪狼湖》舞台劇嗰陣，已經同憶蓮合作過，所以佢哋都好有默契，學友因為好鍾意用國語演繹，所以呢次喺香港公演都繼續做國語版。據聞學友好欣賞憶蓮同許慧欣嘅歌聲，所以就點名同佢哋合作，而呢兩位女歌手亦已經初步答應演出，憶蓮會做多幾場，而佢放假嘅日子就由許慧欣接替。
馮仁昭就有關消息問過主辦單位之一嘅輝皇娛樂負責人趙先生，佢噚日喺電話度話：「舞台劇下個禮拜就會優先訂飛，做完香港呢一站，跟住會去重慶、西安同上海，憶蓮話到時有期一定會客串。」
周杰倫呢幾年喺樂壇成績有目共睹，佢噚日獲馬來西亞青年及體育部副部長拿督翁詩杰頒發「模範青年獎項」，拿督話希望大馬嘅青年都以周杰倫做學習榜樣，周杰倫最初以為要用英語對答，後來見到拿督用華語演講時，佢即刻鬆咗一口氣，重笑咗出嚟㖭。
周汶錡（Kathy）早前去咗峇里幫護膚品牌Bella拍攝平面廣告，今次除咗做模特兒之外，Kathy重第一次落手落腳搞埋形象，由服裝、化妝至髮型都一腳踢。Kathy喺廣告入面都着得幾性感，大騷佢嘅白滑肌膚，雖然做形象指導對Kathy嚟講係一項大挑戰，但係影出嚟嘅效果咁靚，辛苦啲都值得啦！
詹瑞文噚日喺灣仔宣傳佢三月演出嘅舞台劇《男人之虎》，佢以一身踢拖豹紋睡衣現身，重即場學鵝頸橋啲阿姑打小人，佢一面打一面猛咁話「特區政府多小人」，十分搞笑。詹瑞文話到時佢會喺劇中講吓𠵱家嘅熱門時事話題，有啲人物佢到時重會開埋名嚟講，至於會唔會講俾人逐出國家跳水隊嘅田亮，佢就話睇吓到時單嘢out咗未先算喎。
無綫前日出咗內部通告，正式宣布董事及集團總經理何定鈞會喺今年四月底離任，至於何定鈞個位，將會由助理董事總經理陳禎祥、亦即係陳慶祥嘅胞弟接任。另外，無綫早排因為裁員搞到風聲鶴唳，但監製何小慧就逆市獲提升為製作主任。
