搞笑喜劇《非常外父生擒霍老爺》喺美國連奪三周票房冠軍，套片將於下月八號年三十晚喺本地上映，同觀眾共賀新歲。片中主角之一嘅德斯汀荷夫曼（DustinHoffman）繼日前去到英國宣傳後，前日又去咗西班牙馬德里宣傳，其間佢重大爆最鍾意喺去廁所方便嗰陣談心，真係夠晒騎呢。
德斯汀荷夫曼前日一支公去到馬德里宣傳《非》片，佢話多數人都鍾意喺床上同枕邊人傾偈，但佢就鍾意一路屙一路講心事，佢話：「我由細到大都覺得廁所係談心嘅好地方，以前我同兄弟喺廁所傾偈，之後就同伴侶喺馬桶上交換意見。」
德斯汀重話佢喺拍片時曾經要求喺片中飾演佢老婆嘅芭芭拉史翠珊（BarbraStreisand）一齊去廁所揣摩吓角色，點知芭芭拉嚇到儍咗，德斯汀話：「芭芭拉同我只可以喺銀幕上做夫妻。」
講番《非》片，德斯汀同芭芭拉呢對騎呢夫妻會同非常外父羅拔迪尼路（RobertDeNiro）大鬥法，德斯汀一心諗住同親家迪尼路喺球場上修補關係，點知弄巧反拙，兩親家各出茅招爭波踢，引發連場笑料。原來幾位影壇巨星平時甚少接觸美式足球，所以佢哋為咗呢場騎呢足球戲而需要接受訓練，咁先可以演得夠自然同搞笑。