利物浦順利打入聯賽盃決賽，將要硬拼車路士，但就唔代表佢哋嘅黑氣一掃而空，因為前鋒施拿馬好大機會提早「收咧」，成季傷兵湧現無停過。
利物浦方面證實咗施拿馬膝部韌帶撕裂，雖然詳細報告未出，但韌帶受傷養傷時間一定唔會太短，快極都要六、七個月，即係話施拿馬基本上今季餘下四個月再上陣機會已接近零。對於賓尼迪斯嚟講，啱啱羅致咗摩連迪斯返嚟後，又無一個前鋒，等於無補充過兵源。
我求大俠對利物浦由季初開始傷兵不斷，至今肯定超過十個球員曾經列入過傷兵名單，都不禁搖頭歎息，而且個個傷勢都唔輕先至弊；施斯同阿朗素「收咧」，𠵱家又多一個，賓尼迪斯使唔使好似卡迪夫千禧球場咁，搵個風水師傅睇一睇個球場？
前德國後衞布林美素以冷靜見稱，九○年世界盃決賽有個十二碼，隊長馬圖斯當時冇「吉屎」去射，將重任交咗畀布林美，結果佢不負所託重贏埋個盃。日前布林美個大仔無端暈倒，差啲救唔番，嚇倒鐵漢喊到唔收得聲。「我咩風浪未見過！真係從來都未試過喊成咁。」
車路士前晚贏曼聯入英聯盃決賽後，「油王」阿巴莫域治走入更衣室同球員慶祝，點知班人興奮過頭，噴到佢成身香檳。事後車仔領隊摩連奴笑說話「油王」下次會諗清楚先敢行入更衣室。但「油王」投資咁多錢，無非想做英超同歐洲盟主，如果車仔捧到盃，噴多幾次佢都制呀！
NBA啱啱推出一系列球星啤牌，除咗有球星嘅漫畫肖像外，重有埋簽名同號碼，一副牌定價十蚊美金。但係NBA向來最反對賭博，好似「賭城」拉斯維加斯一直好想搞一支NBA球隊，不過俾聯盟堅決拒絕。點知𠵱家NBA自己又推出用嚟賭博嘅啤牌，真係講一套做一套！
前晚意大利盃AC米蘭主場險勝烏甸尼斯三比二，賽後焦點係養傷超過三個月嘅「帥哥」恩沙基終於復出，下半場中後段後備上陣。佢一出場，即刻獲得主場球迷起立鼓掌，威到震；美中不足係佢甫落場即近門失機，喺小禁區未能接應雷哥斯達嘅傳中球，過咗個又喜又悲嘅晚上。
逢周一至周五見報