蔡少芬為開拓內地市場，去年留守內地拍劇，收入豐厚，今年為了收復香港失地，她決定多點時間留港拍無綫劇，朝着「○五年我最喜愛的女主角」大獎進發。
無綫劇集《棟篤神探》成為去年劇集收視之冠，除了男主角黃子華之外，女主角蔡少芬亦居功不少。去年蔡少芬大部份時間留在內地拍劇，甚少在港曝光，幸而《棟》劇甚受觀眾歡迎，借助無綫劇集始終能保持一定的知名度。
蔡少芬說：「出去耐咗，都有想返屋企嘅感覺。舊年我喺內地拍咗兩套電視劇，我覺得香港同內地唔同，兩地嘅得着都唔同，出面拍劇待遇係好，但係TVB一手帶大我，總係有感情，而且以TVB嘅知名度，拍劇之後，回報都唔少。」
蔡少芬坦言今年希望朝着無綫「我最喜愛的女主角」大獎進發，她說：「其實最主要我同TVB拍劇唔係講錢，TVB就好似我屋企，我幾鍾意返屋企。今年我會多啲留喺香港，𠵱家同TVB都傾緊新劇，未落實，係乜就唔方便講。」
蔡少芬直認自己是一個傳統的女人，到了適當的時候，會希望結婚生仔，組織家庭，她說：「我都想有個家庭，不過我自問未夠成熟。」一臉正經的蔡少芬被問到母親可有催婚？她笑說：「我事業如日方中，都係順其自然啦！我咁靚女，使乜擔心？靚花使乜驚冇人要？我諗我阿媽反而要擔心我太快嫁出去㖭！」
採訪：楊潔雯 攝影：林德雄
化妝：KennethWong
髮型：Barry（HairCorner）
服裝提供：DKNY
場地提供：都會梁山泊日本料理