雞年將至，樂壇至今推出了兩首賀年歌，包括英皇群星的《八星報喜賀賀喜》和劉德華的《恭喜發財》，但謝霆鋒接受電台訪問時，竟大讚華仔的賀年歌，卻大彈自己公司的《八》曲水準差，連他飼養的龜聽了都會生病。
謝霆鋒昨日接受商台節目《叱咤樂壇》訪問，DJMini將新派台的歌曲給他品評，霆鋒說：「我聽咗兩次，有啲歌一定要飛咗佢，唔飛怕我啲龜會病呀，好似首《八星報喜賀賀喜》。死啦！我等陣重要返公司，肯定俾人抦。」
霆鋒續說：「所以呢首歌冇謝霆鋒，或者我唔夠健康、唔夠開心啦。我唔係唔鍾意恭喜人，但首歌都冇容祖兒，亦絕對冇王傑啦，首歌係諗唔到嘢、為做先做，可以講係應節，情緒係開心，但over（過份）咗囉。」霆鋒又大彈《八》歌的粵曲部份，他說：「都唔係嗰樣嘢，係為做而做，唔係由心出嚟。」
對於劉德華同期推出的賀年歌《恭喜發財》，霆鋒則有讚沒彈，他說：「呢首都可以應節，成首係為內地市場而做，華仔好清楚中國文化，佢做就合理好多，感覺上有中國人味道。」
霆鋒事後接受訪問時說：「佢哋根本未明粵曲嘅味道喺邊，好似阿姐唱就真係想向佢敬禮，佢唱得好有星味。」問霆鋒若英皇要求他唱賀年歌時，會否答應，他說：「頭三年都有要求呀，我唔會囉，都唔適合。」
霆鋒補充說：「我都有讚Twins首《十八變》啦，我唔係音樂人，只係鍾意音樂嘅人，其實我以歌手身份講好尷尬，但我上得去唔想呃聽眾，只講恭敬說話做乜要上？」
此外，華仔昨接受新城訪問，談及霆鋒欣賞其賀年歌，他說：「每年英皇都有project唱新年歌，其實係想帶歡樂畀大家。我揀歌係想內地嘅人都聽得，所以揀咗國語歌，最初想用《財神到》crossover，將歌詞改為，『劉華到，劉華到，好心得好報…』只係冇時間做。」
採訪、攝影：胡比
