自從澳門賭業股熱潮冷卻，小初發現好多炒家轉去炒工業股，因為芬佬近排對呢類股票有興趣。
好似南太集團去年分拆上市的NAMTAIEEP（2633），上市以來股價一浪低於一浪，最近終於見到有多少起色。
經紀黃話，電子產品製造方案供應商NAMTAIEEP將在2月7日公布全年業績，江湖傳聞話飲得杯落，加上芬佬收集多時，所以股價終於向上。
隻股喺去年4月以3.88元招股上市，除掛牌第一日叫做升過一陣，之後從來未好過，最低曾經見過1.87元，真係聞者傷心，見者流淚，其實公司之前3季業績盈利都OK，早排阿媽南太公布第4季營業額，更話破晒紀錄，斷估阿仔都唔慌差。
NAMTAIEEP昨日升3.33％，收2.325元，成交股數866萬股，金額2001萬元。
另外，經紀陳至愛的濠賭股邁特科技（1031），自從上周復牌後，股價一路直插，噚日才稍見起色，回升5％，收0.31元。佢話係大戶終於肯出來收貨。
慕容小初