戴夢夢在早前的四大樂壇頒獎禮中成績未見突出，她表示與眾新人均十分友好，惟獨與薛凱琪不甚稔熟，夢夢又大爆對方曾在記者會後台視她如隱形人，在台前卻忽然變臉與她聊天。
戴夢夢在早前的四大樂壇頒獎禮成績未如理想，夢夢日前在將軍澳接受本報訪問時承認對自己的成績十分失望，她說：「我唔滿意，都有失望、有唔開心、重有喊過，但今年對手多，我已經盡晒力。」
去年女新人特別多，不過夢夢揚言一班女孩相處得很好，她說：「我哋成班一齊，官恩娜、梁洛施（Isabella）、吳日言、陳苑淇同董敏莉，大家都好好呀。舊年做倒數騷，Isabella重畀咗個暖包我，但佢都凍㗎，係朋友至會咁做。」
問夢夢為何不提薛凱琪？她笑說：「同佢冇咁熟，佢比較少嘢講，慢熱啲啫。」曾有報道指薛凱琪沒禮貌，甚少與人打招呼，未知夢夢覺得對方態度如何？她說：「我記得喺新城嘅新人巡禮記者會，我哋喺後台準備出去，我企喺佢後面，同佢傾偈啦，但係佢冇應我，可能佢聽唔到啦，後尾大家出到台前，佢又同我傾偈，咁我覺得做乜呢？但係我都有同佢講嘢嘅！」
問夢夢是否視薛凱琪為朋友？她說：「做得我朋友一定要有禮貌，我同佢唔係好熟。」有傳薛凱琪遭新人杯葛，成為「獨孤精」，夢夢對此說：「少啲人同佢傾偈啫，佢唔係『獨孤精』，佢公司好多人包住佢㗎。」
採訪：朱倬誼 攝影：陳志嵐
服裝：SistyrMoon
