關心妍（Jade）去年可算運滯，先後經歷綁架驚魂、被無綫封殺以及寫真集一度被禁出版等，今年阿Jade將拋開種種不快，朝着創作歌手目標進發，而李克勤便是其目標。
關心妍去年遭遇綁架驚魂、被無綫封殺和寫真集一度被禁止出版等難關，幸好一直得到媽咪支持，在這些不快事情過後她亦有所得着，阿Jade日前說：「我學識咗珍惜，因為喺眼前嘅嘢真係可以突然間冇晒，所以有人讚我一定唔會飄飄然，只會謙虛啲、努力啲咁做落去。」
至於工作方面，阿Jade透露會朝創作歌手的目標進發，李克勤便是其學習目標，她說：「我覺得之前嘅歌係偏向商業，所以希望嚟緊做一隻創作大碟，起碼有一半嘅歌係自己寫，如果可以有克勤咁成功已經好開心。」
而阿Jade一直予人有點「娘」的感覺，初入行的打扮亦不時被抨擊沒有品味，原來阿Jade當時並沒有同感，她說：「我嗰時真係唔覺自己娘喎，因為身邊有好多人話我靚，話我OK。」
阿Jade坦言多得形象指導的幫助才能成功擺脫「娘妹」這行列，不過她並沒因此變得有時裝觸覺，她說：「其實我一直都唔留意時裝，好多人都話女仔係好貪靚，我諗我係一個例外，我唔鍾意行街，又唔鍾意睇時裝書，同埋我真係好怕自己去買衫。」
採訪：李珮洳巠攝影：陳慧安
場地提供：海港城 服裝提供：RNA
髮型：DanielChow@HipbyHairCulture
