噚日立法會辯論施政報告時，親中工聯會陳婉嫻勁鬧董政府過去七年都係等運到，都冇做過乜去幫失業嘅人。嫻姐重做埋人肉卡拉OK，大唱張學友嘅陳年金曲「等你等到我心痛」，表達佢嘅憤慨。
嫻姐嘅歌喉以工會嘅標準嚟睇，都算係咁啦，佢啲黨友王國興同鄺志堅都同八方講，嫻姐其實練過歌㗎，如果要為嫻姐「查找不足」，就係佢唔小心唱錯歌詞，嫻姐將「等你等你等你，一世一世等你，我真的真的不願捨棄」呢句，將「捨棄」兩個字唱咗做「放棄」。
答辯嘅官員葉澍堃當然唔同意啦。堃哥話，勞工市場自○三年起一直有改善啦，希望嫻姐下次唱歌，可以唱首新歌「不再心痛」啦！
上個星期啱啱流完會，噚日立法會開九點鐘，唔知係咪太早，唔少議員瞓晏咗，搞到立會九點鐘開波時都唔夠人，要等多幾分鐘先至夠人開會。
（圖）嫻姐噚日喺立會大唱「等你等到我心痛」。
傳真︰2623-9278
電郵︰