尖沙嘴漾日居第五座，自今個月中拆售以嚟，市場反應理想，短短十幾日已賣出近五十伙，連電視藝員葉璇都被吸引，早前去睇樓後極速入市，不過買入嘅唔係發展商一手貨，反而喺二手市場搵啱心水單位。
美聯曹澤霖話，葉璇購入嘅係三座中層D室，面積一千一百七十呎，成交價六百八十五萬，呎價五千八百，屬市價。代理話，發展商都有類似呎數嘅單位賣，不過價錢就貴兩、三成，千零呎單位賣成一千萬，反正葉璇鍾意物業嘅保安夠嚴密，一手同二手都冇分別，梗係買二手化算啦！
聽講葉璇𠵱家租住將軍澳700幾呎單位，一直有意買樓做業主，亦睇過區內唔少新盤，不過一路都睇唔啱，直至早排得悉永泰亞洲拆售漾日居，就趁空檔去睇樓，點知帶挈咗二手市場。
好多明星藝人賺到錢，都會買番啲物業，年輕一輩嘅有Twins、楊千嬅等、老一輩就有已故粵劇名伶任劍輝同薛覺先等。而薛覺先持有嘅東半山福群道三至四號，由佢嘅後人興建咗一幢四層共十二伙嘅低密度住宅「覺廬」，多年前賣咗五個，其餘重揸住收租。
世紀21張無忌話，嗰五個賣散嘅單位，最近錄得轉手，低層A室，八百五十五呎，連車位以四百八十八萬賣出，呎價五千七。
買家計劃作新婚居所，加上近返工地點，所以就算單位有二十六年樓齡都唔介意。
至於原業主就因為喺東九龍買咗樓，所以將單位放售。不過比起佢九七年嘅購入價，都要蝕百零萬。
張無忌表示，𠵱家「覺廬」只得一個放盤，係頂層單位，連五百幾呎天台，叫價五百八十萬。
舖位所以值錢，其中因素係靈活性比其他物業大，租客選擇性高，租金自然較好，好似大圍火車站隔籬嘅金禧花園地下二號舖，最近由一個菜檔以月租六萬二承租，即呎租六十二蚊，畀到業主六厘八嘅理想回報。
中記黃培權話，個舖一千呎，之所以有菜販肯以高市價五個巴仙承租，因為貼住個街市，但比街市方便同衞生，金禧地下早就有唔少舖賣餸菜，證明有得做，加上馬鐵通車，大圍站人流增，個菜販計過有得做。
鴨脷洲海怡半島單日錄得二十宗成交，全部由美聯海怡半島西翼分行促成，都算係一個破天荒紀錄。前日之所以咁旺，主要係有個中資客一次過掃咗十二個單位，令到單日成交量由八宗飆升至二十宗，涉及金額高達六千二百萬。
美聯吳家棟話，海怡半島平均每個月有四、五十宗成交，美聯佔五至六成，前日由一分行喺一日內做咗一個月嘅數，真係破晒紀錄。
大嶼山迪士尼樂園將於今年九月正式啟用，東涌呢個新發展區，前景一片向好。長實喺區內嘅大型屋苑映灣園，就食住呢個迪士尼概念，同埋趁住農曆新年就快到，向買家同參觀人士送揮春。
為緊貼呢個充滿歡樂氣氛嘅迪士尼樂園主題，所有揮春都印有同迪士尼有關嘅卡通公仔，例如米奇老鼠、維尼熊等，預先將迪士尼嘅歡欣送畀公眾。
美聯物業舊年急速擴張，員工數目大增，周年晚會已經搵唔到場地，容納晒所有同事，惟有分開兩日擺，噚日輪到後勤，當晚一樣有員工表演同抽獎。廣告部兩女將以Twins形象唱「女人味」攞獎，主席黃建業重講笑咁話，佢哋好過前線嗰晚請嘅嘉賓2R喎。至於抽獎方面，兩個大獎男女裝勞力士表，咁啱同前線嗰晚一樣，男嘅抽到女裝，女嘅抽到男裝。
講開美記，黃老闆趁農曆年就快到，宣布派花紅好消息。除後勤外，連二千八百個前線營業員，今個月都有花紅分，認真少見，金額就因應職級同埋表現而定。聽聞，每個月為公司帶嚟六萬蚊營業額嘅員工，都會派足一個月，以月薪五千五百計，涉資一千五百幾萬。
電郵地址：
