第三屆凸首大戰，始終係本年度刺激話題，隨住唐唐慘遭任命為「扶貧委員會」主席，扶貧置散，另一隻黑馬太子章，近日則因在立法會怒斥議員做騷，然後又痛斥「流會大行動」係浪費公帑，亦有靜靜起飛迹象喎！
「商人治港」，喺壽爺日漸變幻嘅面色之中，其機會日漸淪為同「民主派治港」一樣嘅賠率，甚或餐屎有朝一日重低過「長毛治港」，都唔係話冇可能。公僕治港，唔係唔好，不過公僕精於執行開上主指令，要公僕自己揸主意做乜唔做物，始終唔係強項！
咁「專業治港」呢？太子章唔係商人，係專業醫生，同時亦做過中文大學校長，劍橋畢業，夠晒理性！消息人士話，其實，太子章揸緊「教育」個莊，講到扶貧，李前校長兼阿虱王，先至最有心得！
扶貧兩字千頭萬緒，全無焦點，不過若然話：「知識改變命運」，咁就唔同嘞！貧窮最大根源，唔係冇最低工資，亦唔係政府醫院收費貴畀唔起，亦唔係仔女冇錢學鋼琴，而係冇知識，啲行為愚蠢，頭腦簡單，冇書讀，細個掛住捉泥鯭，大個咗，就嫖賭飲吹瓣瓣齊，所謂跨代貧窮，就係父母冇教育，仔女冇書讀，兩代衣食唔足又不知榮辱，於是一家大細齊齊走去偷豬肉！
消息人士話：若然太子章可以揸正「十年樹木即是最基本的扶貧，百年樹人就係最徹底的跨代扶貧」呢個宗旨，全力推動教育改革，早日落實三改四，一啲多餘嘅學院，應削資就削資，該執笠就執笠，若然有人為自己利益阿芝阿佐，一於遇佛殺佛，喺壽爺溫寶面前舞一輪關刀，刀鋒過處，飛起幾條雞毛，喔喔聲撻落幾隻抹完頸未斷晒氣嘅雞，喺新嘅雞年，未必冇得走位！
太子章優勢，就係淨管教育，是非少，可能俾老左啪針（不過鄧小平夠留學法國喇，咁先至有國際視野），至於老婆係鬼婆，呢一樣老左維園阿伯亦會怒火中燒，不過壽爺溫寶，咪猛話與國際接軌咩？太子章喺三十年前就搶先交接咗咯，第日出國訪問，最緊要老婆大方，出得廳堂，唔會四圍指住個鼻問人，你知唔知我係邊個？
傳真︰2623-9278
電郵︰