本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如僱主或僱員有任何疑問，可致電勞工處查詢。
查詢熱線：27171771
此熱線會由「1823政府熱線」職員接聽。
秘書小姐：喂，恭喜恭喜，恭喜你有喜。
會計太太：多謝多謝！我本來都好開心，但係醫生話我有少少作小產，叫我休息多啲同密啲覆診。唉！唔使做咩！我邊有咁多假成日去睇醫生？
秘書小姐：喂，唔係噃，你去做檢查係當病假計㗎噃。
會計太太：但係《僱傭條例》寫明，要唔少過連續四日嘅病假先可以攞津貼。做檢查要做成四日，大吉利是咩！
秘書小姐：唏，條例有另外寫明，懷孕僱員因為產前檢查、產後治療或者小產而缺勤嘅每一日，如果有適當嘅醫生證明書，就可以當病假計，可以有相等於正常工資五分之四嘅疾病津貼，唔使連續四日或以上。咁當然，你都要儲到足夠嘅病假數目先啦。
會計太太：唔，成日攞假好似唔係幾好咁。
秘書小姐：咪儍啦，醫生叫得你覆診，就即係有需要啦。如果你為咗咁唔去睇醫生，到時真係出事要放長病假，公司損失咪重大。話時話喇，你通知咗老闆未㗎？
會計太太：未呀。
秘書小姐：你快啲遞醫生證明書通知老闆啦。《僱傭條例》下嘅生育保障係由你遞咗醫生證明書之後至生效㗎。你都要畀時間老闆去安排人手㗎嘛。
以上資料只用作說明《僱傭條例》下的相關條文，對有關法例的詮釋，應以《僱傭條例》原文為依據。如有任何爭議，則以法院的判決為最後依歸。
資料提供：勞工處勞資協商促進科
服務熱線
電話：29908288
傳真：23702192
電郵：