上個星期立法會玩到咁大鑊，因為職工盟李卓人喺會議開始後，唔肯坐低，反而帶領泛民主派為趙紫陽站立默哀一分鐘，搞到保皇黨反枱離場玩流會，今個星期三再開會，仍有餘波。范太一如早前預告，作風要更強硬，噚日果然唔等議員，準時下晝兩點半就入到立法會議事廳。
議員噚日如常站立迎接范太入座，等到大家坐低時，李卓人因為分神睇咗一吓腰間嘅傳呼機，未及時坐低，范太唔知係咪驚阿人又想為剛去世嘅護法蕭蔚雲默哀，好似有些少神經緊張，急不及待咁話：「李卓人，請你坐低！」
過咗一陣，范太又同長毛爭拗起來，范太話長毛嘅發言同質詢問題同主題不符，終止佢嘅發言，長毛唔服，嘈嘈吓，以前多數用「不檢點」嚟鬧長毛嘅范太，噚日首次用「行為極不檢點」嚟警告長毛，爭啲就要趕長毛出會議廳，好在最後都相安無事。
（圖）長毛噚日俾范太鬧，由「不檢點」升級咗做「極不檢點」。
傳真︰2623-9278
電郵︰