立法會今年認真好玩，好似自由黨田北俊形容，直情係十國咁亂，連工聯會代表都學埋民主派玩walkout，重點樣實行強勢行政主導？
八方聽聞，王國興嗰日因廖秀冬不理區議會意見，憤而退席，陳婉嫻事前並不知情，知道後亦好愕然。同王國興一齊入局嘅鄺志堅，都叫佢唔好咁搏命，事關開始嘅時候，新人都想建立形象，𠵱家人人都知王國興唔好蝦，就要收吓手，調整吓策略。
鄺志堅話，當初有人話佢聽，做功能組別嘅議員冇咁辛苦，原來係假嘅，加上佢同王國興係新人要勤力啲，逐個工會去拜會，到星期日同假期，都喺屋企抱頭大睡，補番平日嘅「不足」。
鄺志堅係法律界出身，佢話做咗議員之後的確有啲唔同，就係官員會畀面啲，幫到勞工界解決問題，至於政治問題，因為係中方主人話事就冇得講，「簡直係火星撞地球，上次流會見到晒。」
傳真︰2623-9278
電郵︰