睇嚟投資者眼光愈來愈雪亮，識得分析買邊隻新股好，唔會盲目見新股就抽。
好似噚日有三希話撤銷上市計劃，但王朝酒業（828）不但招股深受歡迎，首日掛牌表現亦驕人，收3.125元，較招股價高近4成，抽到貨嘅投資者，真係個個笑呵呵。經紀黃話，王朝升勢有餘未盡，再抽高啲重得。
另外，上市時表現平平的天虹紡織（2678），近期好勤力搞好投資者關係，除咗搞睇廠活動外，更不時與芬佬見面。聽聞早排有個美資芬佬，在市場上買咗唔少天虹，睇嚟股價好快會浮上水面。
天虹喺去年12月初，以招股價1.15元上市，但表現唔多好，保薦人接貨接到手軟，最低曾經跌至0.89元，但近排股價回穩，企硬在1元樓上，天虹噚日收報1.06元，下跌約1％。
經紀黃話，天虹客戶以大陸市場為主，當本地紡織商受美國保護主義威脅時，天虹並無呢個問題，其他同類紡織股，PE多以雙位數字計，而天虹只係6倍，可追落後。
慕容小初