港股大挾倉後，噚日仍有再升之力，恒指收13623，升39點，但似已有舉步維艱之勢，暫時向上阻力在13700至13760水平，會否升破，視乎大戶心意，家吓幾乎全民睇淡，唔排除升破阻力，衝番上14000後，殺多轉淡倉，才再掉頭回落，向下尋底。明天期指結算後，形勢可望明朗化。
濠賭股風險大，玩此類股票，10%的止蝕策略好重要。濠賭股早輪升幅以倍計，呢排大調整，跌幅亦好驚人。
聽同澳門大孖沙有好密切關係嘅可靠消息話，大孖沙已明言呢輪「濫竽充賭」嘅人太多，一定要清理門戶，叫定各個廳主唔好亂嚟。家吓已染「濠」同充「賭」的上市公司不下數十家，相信經呢次「大清洗」後，起碼有一半會人間蒸發，剩低嘅先有資格繼續玩落去。事實上，今次「大清洗」，去蕪存菁，無疑係幫咗投資者一個大忙，「濠」股家吓只係第一個大升浪後嘅大調整，之後重會有第2個同第3個大浪，起碼可持續多一年半載。
地產股有好表現，華置（127）高收5.15元，升7.8%，聽聞有大行已開始做工夫，提升佢嘅評級，即係短線仍可看好；同系嘅利福國際（1212），收12.05元，亦有4.3%進帳。
呢輪唔「興」玩工業股，但實際上，好多工業股都已跌到好「抵」嘅水平，家吓上車，揸番三數個月，都應該會有幾可觀嘅回報。德信科技（1228）股價近兩月來由38.5仙落到31仙，成交亦大幅減少，同業績嘅表現完全唔相符。德科04年度（12月年結）的上半年，營業額2.29億元，升23%，獲利5050萬元，升101%，由於公司一直貫徹推行垂直生產，所以毛利率更由21.8%提升到26.4%。
德科係全球最大嘅計數機生產商，新推出的多功能防水手表同STN液晶體顯示屏，銷售亦好理想。為應付市場需要，集團已部署在河南省設立新生產基地，預計農曆新年後可投產，由於薪金和原材料價格較低，預計整體生產成本可降低40%。
04年全年，保守估計賺1.1億元，05年新廠落成，產量倍增，估計盈利可上升到1.67億元，每股盈利11.5仙，就算以4倍PE計，股價已可見0.45元。3月業績宣布前後，股價應有表現。
郭兆誠