跳水王子田亮，因為簽約特區娛樂集團，被開除出國家跳水隊！請問胡溫：跳水王子，點解唔可以轉投娛樂事業？小田田跳完水，想搵少少水，完全符合「讓少數人先富起來」嘅死鬼鄧小平理論，犯咗咩錯？
冇錯，中方係培養咗小田田好耐，不過田亮亦係人，唔係奴隸，佢同中方攞過奧運金牌，咩嘢恩都報晒，冇義務同呢個國家賣命一世！做明星、拍吓戲，可以拓展視野，導演一嗌Camera，即時進入角色，呢一樣，同企喺跳水平台插水前深呼吸凝神靜氣嗰吓深呼吸完全相同！小田田拍吓戲、跳吓水；跳吓水，又埋位拍番幾場，拍戲同游水嘅精神經驗，互為交流，佢只會愈跳愈叻㖭！
一個明星喺一聲Camera導演大嗌之後入戲，直至一個鏡頭完成，導演嗌「咳」，即是如同跳身插入水，喺水底再浮番上面，跳水係另類嘅做戲，而做戲，亦係精神上嘅插水（雖然好少演員，好似阿董咁，對住支五星旗口噏噏唱國歌一入咗戲，當堂上晒身，到今時今日，胡溫一早嗌咗Cut，佢重懵盛盛咁踩唔到掣咁騎呢），兩者之間，絕無衝突！
唔畀小田田搵定少少傍身，咁「國家」養佢一世呀？一個跳水選手退休，除咗一身風濕骨痛，唔通做紅籌國企上市公司主席呀？呢嗱，除非好似姚明咁，得美帝布殊睇起，成功打入荷李活，身家過億美金，可惜美帝寧願幫襯霍家未來新抱章子怡，都唔係咁睇小田田台戲喎！
加埋做男人，冇富豪照顧，眼見舊愛晶晶，着到周身名牌，就快上到岸，又點怪得自己唔心郁？
中央又話屍爬支持香港電影業？咁多個田亮做港產片大明星唔好咩？港人翹首以待。連楊利偉唔知幾時宣布開拍王晶新片做主角？咁亦係好事嚟！
事到如今，電影老闆不如諗吓開乜嘢戲畀小田田拍好過喇，實有票房喎！
傳真︰2623-9278
電郵︰