八方一直覺得，民建聯頭目曾鈺成用「有辱冇榮」四個字嚟形容同老董嘅合作關係，真實到冇得頂，君不見，單單由老董拍板去馬嘅好嘢，負責執行及執手尾嘅都死得好慘，隨便舉例，已有一個八萬五、一個數碼港。
八萬五大軍師梁振英，由頭到尾都俾人唾罵為始作俑者，煲呔同黃星華盲目執行，有地就起樓，兩個淪為幫兇，搞到今日將軍澳變咗石屎城，孫公接棒都一樣捱打。
至於數碼港，又係老董自己拍板，當時負責嘅局長鄺其志都冇得反對，老董重向議員施壓（呢點新局長未必知），最後通過上馬。鄺神童俾人話佢偏幫電盈，十大地產商追住佢嚟打，呢單醜嘢就本來已經冇人提，但係煲呔又要搞西九單一招標，老董又喺施政報告主動講官商勾結，於是數碼港又成為箭靶，於是原本啱啱先上到民望榜嘅鬍鬚仔曾俊華又要企出嚟焗為老董辯護，民望實回挫喇，咁又玷污咗清白嘅人才，你話老董係咪害人不淺。
傳真︰2623-9278
電郵︰