郭富城、張家輝、譚耀文同Cookies等一班藝人，噚日出席喺赤鱲角機場富豪酒店舉行嘅「雄雞報喜頌耆英」，同一班公公婆婆拜個早年。雖然城城冇上台表演，淨係求其講啲祝賀嘅說話，但啲公公婆婆都已經好開心。
不過張家輝就唔同嘞，佢同幾個公公婆婆喺台上整湯圓，整完之後重好有誠意咁請台下嘅長者食，家輝原本想親手餵其中一位婆婆食湯圓，但係可能個婆婆怕醜，耍手擰頭咁拒絕咗，搞到家輝有啲冇癮。好彩另外有位公公食完家輝整嘅湯圓後，不停讚話好好食，先至𠱁番家輝。
至於最近再戰樂壇嘅阿譚，佢噚日原本諗住唱佢首新歌《錯愛也是愛》，但阿譚話：「最後我都係揀咗容祖兒嘅《我的驕傲》嚟唱，因為我首歌好似唔係好啱呢個場合，都係唱番啲開心嘅歌好啲。」
台灣名模林志玲最近斥資約七十多萬港元，同資深模特兒黃頤等合作開咗間模特兒中心，林志玲嘅媽咪吳慈美同哥哥林志鴻噚日都有出席開幕儀式，林媽媽重話好想個女快啲結婚，佢話：「我跟她說三十二歲以前要結婚，還有一年半可以努力。」
麥浚龍（Juno）噚日喺城市大學出席活動，佢話以前讀書嗰陣，每年都會去內地做義工，如果將來有機會，都希望可以去啲落後嘅地方度做吓義工喎。問到Juno會唔會擔心屋企人唔畀佢去，佢就話：「唔會唔畀！一來為工作，二來又咁有意義。」
黎明（Leon）日前推出佢新碟嘅情人節限量版，隨碟附送一條純銀頸鏈，只要拎呢條頸鏈去指定嘅金行，就可以用優惠價買刻咗Leon親筆簽名嘅戒指。噚日喺尖沙嘴嘅金行同唱片舖，有唔少fans選購戒指同睇唱片，反應似乎幾熱烈。東亞唱片公司嘅宣傳人員話，Leon嘅唱片銷量已有金唱片成績。
陳奕迅（Eason）噚日去咗將軍澳電視廣播城綵排華姐表演，Eason嘅爸爸陳裘大日前為貪污案上訴，佢用咗自己首歌《幸災樂禍》嚟做比喻，佢話首歌嘅內容係講幸福嘅災禍，重話受難應該覺得高興，聽到個個𢱑晒頭，好彩後尾Eason補番句話屋企有事只係過渡期，所以佢會樂觀面對喎。
