旺角新地標朗豪坊經已正式開幕，商場幾乎租晒，前晚開幕禮煙火夜，請嚟董特首撐場，非常熱鬧，一手一腳將朗豪坊由冇變有嘅鷹君副主席羅嘉瑞，更加全家總動員，重睇晒全場表演，包括英國雜技團特技、數碼天幕首映同埋放室內煙花，親兄弟羅旭瑞同姪女羅寶文都有捧場。
鷹君方面話，希望以後每日都能安排一段數碼天幕放映時間，未來重可能再有幾次特技表演。不過，煙花表演就未必再有機會，因為喺室內放煙花有一定難度，需要向政府證明有足夠安全措施，先會獲准舉辦。
據講，呢啲煙花，不同於一般新年維港放嗰啲，係特製嘅，爆炸後即刻冷卻，絕不會燃燒任何物件，所以唔怕有火舌，辣親任何觀眾，大可睇得放心。
不過，成日都好似好忙嘅董特首，就無暇等埋煙花騷，已抽身離去。
高緯物業一份報告話，全球主要商業城市寫字樓租金，香港去年排名第五，比○三年十名不入，明顯超前，頭四位排名則不變。
報告話，香港寫字樓租金去年飆升逾倍，幅度勁過排頭位、只有兩成三嘅倫敦西部。
早排戴德梁行都有個類似調查，香港全球排名第九，兩個調查結果唔一樣，大概係因為戴德梁行所計算嘅，係租務開支水平，即係連管理費、差餉等都計埋。
高緯錄得嘅香港寫字樓租金升幅，高於其他代理行，可能由於佢只計最優質嗰啲商廈（見表）。
新地上水皇府山噚日開記者會，圓滿結束之後，蘭西突然見到華置高級銷售及租務經理柯靄邦，喺售樓處現場觀摩。相信佢事先冇諗過，會失驚無神開記者會，搞到同一眾記者撞到正，但佢冇準備咩新料透露。
不過，到夜晚，柯靄邦出席中記周年晚會，就補番飛，佢話，上水粉錦路洋房，計劃三四月推出。雖然以前講過，都好過乜都冇講。
呢年幾樓市發癲咁好番，捱咗幾年跌市嘅地產代理，終於捱出頭嚟。各大代理𠵱家除咗要鬥跑數之外，年頭年尾，重興埋鬥向員工派錢多。
好似美記咁，冇耐前先話發放雙糧兼花紅，個別員工最多可以攞到相等於全年十八個月糧，啱啱又好闊佬咁講，今個月底，會再向後勤員工，派發年終賞金及特別花紅，最多可以攞到相等於兩個半月嘅糧。但究竟有幾多人攞到呢個數，可能就只有黃主席至知。
黃主席重話，攞完錢，大家就要提高士氣同埋工作效率嘞。
南亞海嘯，各地賑災超過一個月仍然未完，大嶼山愉景灣業主委員會與香港興業，周日舉辦「善心送南亞」籌款，善款捐紅十字會。
當日由中環至愉景灣渡輪及愉景灣巴士收費，一律作捐款用途。此外，喺愉景廣場，舉行愛心步行與高爾夫球車扮靚比賽，每位參加者至少須付一百蚊作登記費，愈多人參加，籌得款項愈多。
大會準備咗多項精采歌舞節目，務求吸引更多市民，一家大細來到愉景灣，做善事之餘，又可以歡度假日。
電郵地址：
